Государственнай мокшэрзянь филармониясь
| Мордовская государственная филармония | |
|---|---|
 | |
| Ащема вастоц | Саранск ошсь, Мордовия |
| Пуроптф | 1943 |
| Директорсь | Кузьмин Сергей Николаевич |
| Художественнай руководительсь | Вишнякова Оксана Юрьевна |
| Сайтсь | koncert13.ru |
Государственнай мокшэрзянь филармониясь руз. Мордовская государственная филармония – Культурань республикань дворецсь – Саранскяйса республикань культурань вастсь. Россиянь инь сире филармониятнень ёткста фкясь, пуроптф 1943-це кизоня.
Эрямопингоц
Государственнай мокшэрзянь филармониясь – тя Россиянь культурань инь сире организациятнень эзда фкясь. 1943-це кизонь 16-це августста СССР-нь Народнай Комиссаронь Советть ведеса Искусствань тевонь комитетть 368-це № приказонц коряс ульсь пуроптф культурань учреждения Концертонь-эстрадань бюроть видеса. 1962-це кизоти самс культурань тя учреждениять видеса покодсть «Умарина» государственнай моронь и кштимань ансабльсь, Рузонь народнай инструментонь Темниковань оркестрась, морамань и инструментальнай ансамбльхне, покодсть и солистт, и художественнай валонь артистт. 1963 – 1979-це кизотнень филармониясь ашезь покоде, сонь тевонзон тиендезень Мокшэрзянь музыкально-драматическяй театрать концертонь отделоц, конанди вятикс ульсь Россиянь заслуженнай артистсь Д. И. Еремеев[1].
1979-це кизоста сявомок Мокшэрзянь филармониясь поладозе эсь тевонц[2]. Путфкс искусствать инголи молеманцты сувафтсть коллективть пуроптыенза и вятиенза: Л.И.Воинов, П.П.Емец, Г.И.Сураев-Королёв, Н.С.Рузавина, С.В.Балабан, В.И.Четыркин, Н.П.Спиркин; певцы-солисты: И.М.Яушев, Е.А.Охотина, Р.М.Беспалова, Д.И.Еремееев, Р.С.Анисимова, М.Н.Антонова, Л.Н.Ганина, А.Н.Куликова, Н.В.Маркова, А.А.Клыков, Л.А.Кузнецова, Н.В.Спиркина, И.П.Учватова, О.К.Глебова, Е.С.Алышева; инструменталисты: В.П.Абрамов (гитара), Л.В.Круг (скрипка), В.Н.Зимин (балалайка), А.П.Путушкин (баян), И.В.Бегаев (баян), А.П.Генералов (баян), О.А.Вельдяскина (фортепиано); концертмейстеры: В.Н.Рупышева, Т.В.Фраткина, Е.В.Богатикова (фортепиано), В.И.Козляков, В.П.Кошелев, А.С.Агаджанов, В.В.Мартышкин (баян).
Музыкальнай коллектифне и солисттне
Мекольце колма 10-кизотне филармонияти арасть пяк козят тевса. Тя пингть шачсть од коллектифт[3][4]:
- 1978 – «Вастома» эстраднай ансамбльсь,
- 1979 – «Келу» фольклорнай ансамбльсь,
- 1980 - «Лайме»,
- 1994 - «Росичи» тяниень пингонь народнай моронь ансамбльсь («Росичи» государствань мокшэрзянь моронь театрась),
- 1995 - «С песней по России»,
- 1996 - «Лейне» народнай кштимань ансамбльсь,
- 1998 - «Светлица» («Девчата» ансамбльсь),
- 2002 - «Арт-вижн» шоу-балетсь («Арт-вижн» кштимань театрась),
- 2003 - «Разгуляй» казаконь моронь и кштимань ансамбльсь
- 2004 - «Арсема» эстрадань вокальнай хореографическяй ансамбльсь.
1955-це кизоста ушедомок, 1993-це кизоти самс тяса солисткакс ульсь РСФСР-нь Народнай артисткась Антонова, Мария Николаевна.
Тевонза
Тяниень пингть Мокшэрзянь филармониять видеса ули музыкань лекторий (музыкань содайхне: Л.С.Носенкова и Ф.А.Шкермонтова), «Тропинка» хореографиянь идень студия. Мордовиять эзга филармониясь най ётафни творческяй коллективонь концертт (симфоническяй оркестрань, хоронь, ансамблень, народнай инструментонь оркестрань и стак тов) и лия аймакста, государстваста содаф артистонь концертт (Москуста, Санкт-Петербургста, Казаньцта, Украинаста, Белоруссияста, Финляндияста, Эстонияста, Венгрияста и стак тов)[5].
Оцюнятне-вятихне
Оцюнякс ульсть: Ю.В.Ильин, В.В.Медведский, А.И.Марычев, М.И.Нахимовский, И.И.Поршин. Художественнай вятикс покодсть: И.В.Бегаев, С.В.Балабан, Д.И.Еремеев, А.П.Путушкин, А.Б.Харламов. Оцю путфкс филармониять касоманцты-виияманцты тись РМ-нь культурань заслуженнай работниксь Н.Ф. Серкин, кона ульсь оцюнякс 1992 – 2008-це кизотнень.
2008-це кизонь августста сявомок 2013-це кизонь январти молемс филармониять вятезе РМ-нь искусствань заслуженнай работниксь В.И. Шарапов, кона оцюнякс арамда инголе ульсь филармониянь главнай режиссёркс.
2013-це кизоста сявомок филармониянь оцюнякс покоди РМ-нь культурань заслуженнай работниксь С.Н. Кузьмин. Филармониянь кудсь и залсь Государствань мокшэрзянь филармониять ащема вастоц тяфтама: Саранск ошсь, Пролетарскяй курось, 39-це кудсь. Филармониянь залса 1040 озама васта, конатнень эзда 658 партерса и 382 балконца. Сценать крхкалмоц 15,9 метра и келец 13 метра.
Лятфтамат
- ↑ Мордовская государственная филармония – Республиканский дворец культуры. mktrm.ru. Дата обращения: 29 апрельста 2021. Архивировано 29 апрельста 2021 года.
- ↑ Республиканский дворец культуры (Мордовская государственная филармония), Саранск: официальный сайт, адрес, контакты — Каталог компаний Cataloxy.ru (рус.). saransk.cataloxy.ru. Дата обращения: 29 апрельста 2021.
- ↑ Мордовская государственная филармония — Республиканский дворец культуры — Саранск, ул. Пролетарская, д. 39. Подробная информация: расписание, фото, адрес и т. д. на официальном сайте Культура.РФ (рус.). Культура.РФ. Дата обращения: 29 апрельста 2021. Архивировано 29 апрельста 2021 года.
- ↑ Мордовская государственная филармония — Саранск - городской сайт. www.saransk-online.info. Дата обращения: 29 апрельста 2021. Архивировано 21 июньцта 2021 года.
- ↑ История — ГБУК "Мордовская государственная филармония —(рус.). Дата обращения: 29 апрельста 2021. Архивировано 29 апрельста 2021 года.