Астраханцев, Сергей Васильевич

Сергей Васильевич Астраханцев
Сергей Васильевич Астраханцев
Шачема шиц	10 (23) сентябрьста 1914
Шачема; вастоц	Темникав, Тамбовскяй губерния[d], Россиянь империя[d];
Кулома шиц	8 августста 1943 (28 кизоц)
Кулома; вастоц	Сумская область Великописаревскяй районць,Братеница велеть видеса, Украинскяй ССР-сь, СССР--ь
Принадлежностсь	СССР
Войскань родсь	Пехота[d]
Служама кизонза	1936—1938, 1941—1943
Званияц
Частец	367-й стрелковый полк 71-й стрелковой дивизии
Должностец	командир стрелковой роты
Сражениятне/войнатне	Великай Отечественнай война;

Серге́й Васи́льевич Астраха́нцев (1914 — 1943) — советскяй военнайсь. Великай Отечественнай войнаса улись. Советскяй Союзонь Геройсь (шавомдонза меле 1944-це кизоня).Старшай лейтенантсь.

Эряфонь киц

Сергей Васильевич Астраханцев шачсь 23-це сентябрьста 1914-це кизоня Тамбовскяй губерниянь Темникав уезднай ошса (тяни Мордовия Республикань районнай центра) Астраханцефнень покодить Василий Александровичть и кудазоравать Любовь Алексеевнать семьяса.

1921-це кизоня Астраханцефнень семьясна ётасть эряма Ташина посёлкас (тяни — Нижегородскяй областень Первомайск ошсь). Тяса Сергей Астраханцев аделазень школань сисем класснень, сяда тов покодсь Ташинскяй чугунолитейнай завода паросиловом цехса электромонтеронь тонафникс. 1933-це кизоня Горькяйса аделазе авиационнай техникумонь 1-це курсть. Армияда тердевомда инголе покодсь слесарькс, сяльде Саратовса 195-це № заводса (тяни ОАО «Завод АИТ») диспетчеркс. 1936—1938 кизотнень Сергей Астраханцев ётнесь срочнай служба сокаень-видиень-покодиень Якстерь Флотса. Ульсь Тихоокеанскяй флотса. Службада меле мрдась Саратову.

Покодиень-сокаень-видиень Якстерь Армияв С. В. Астраханцев тердезе 1941-це кизоня 28-це августста Саратов ошень Октябрьскяй райвоенкоматсь. Немецко-фашистскяй захватчикнень карша тюрьсь 1941-це кизоста декабрь ковста сявомок. Ульсь ранендаф, пчксесь госпитальса. Пчкамда меле Сергей Васильевич кучевсь младшай лейтинантонь курсас. 1942-це кизоня октябрь ковста младшай лейтинантсь С. В. Астраханцевсь кучевсь Волховскяй фронту стрелковай 71-це дивизиянь стрелковай 367-це полку. Примась участия Волхов ляйса араламань бойса. 1942-це кизоня декабрь ковста стрелковай 71-це дивизиясь ётась ударнай 2-це армияти, конань видеса Сергей Васильевич примась участия блоканднай Ленинградть "Искра" нельгомань операцияса. Тяда меле Ленинградскяй и Волховскяй фронттнень эса примась участия «Полярная Звезда» операцияса. Ленинградть ала тюремаса Сергей Васильевич ётась ки младшай лейтенантста старшайти и ульсь путф 3-це батальононь стрелковай 7-це ротань командиркс.

Апрель ковть песта стрелковай 71-це дивизиясь ульсь лифтьф резервас и 1943-це кизоня пяшкодемада меле ётафтовсь васенда Степной фронтонь 27-це армияв, а сяльде Воронежскяй фронту. Сонь видесонза С. В. Астраханцев примась участия Курскай битвань Белгородско-Харьковскяй операцияса.

1943-це кизоня 8-це августста Харьковскяй ширети, Сумской областень Великописаревскяй райононь Братениц велеть маласа, врьгятемать пингста стрелковай 367-це полконь подразделениять куродозь немецень пехотась и танкатне, сяс тейст савсь ётамс оборонати. 3-це батальононь участкаса, коса ашельхть танкада средстват, немецень пехотать ширенц кирдезь «Тигр» Т-6 колма танкатне. Няемок батальонть абонгодоманц, С. В. Астраханцев старшай лейтенансь ротанц мархта, кона тяда инголе ульсь резерваса, тусь контратакас. Ляцендихненди макссь приказ керомс пехотать, сонць Астраханцев старшай лейтенантсь танкта фкя тяка ружьять мархта лиссь инголи и виде толса машфтозень немецень кафта танкатнень, аньцек сонь толонь позициянц яжазе гусеницасонза колмоце "Тигрсь".

1944-це кизоня 25-це августста СССР-нь Верховнай Советонь Президиумть Указонц коряс фронтса немецень захватчикнень каршес цебярьста тюреманкса, отваганкса и героизманкса старшай лейтенанти Сергей Васильевич Астраханцевти максовсь шавомдонза меле Союзонь Героень лемсь.

С. В. Астраханцев калмаф Сумскяй областень Великописаревскяй райононь Братеница велеса братскяй калмаса, аф ичкозе тюремань молемань васттнень эзда.

Казнет

«Зрнянь Тяште» медаль (шавомдонза меле 25.08.1944-це кизоня);
Ленинонь орден (шавомдонза меле 25.08.1944-це кизоня).

Колганза мялямть ванфтомац

Саратов ошса «Завод Автономных Источников Тока» ОАО-ть территорияса путовсь С. В. Астраханцевонь Советскяй Союзонь Геройть бюстоц.
Мордовия Республикаса Темникав ошса Московскяй куроса кудса С. В. Астраханцевонь Советскяй Союзонь Геройть лемс ладяф лятфтамань седяф.
Советскяй Союзонь Геройть С. В. Астраханцевть лемоц Украинань Сумскяй областень Великописаревскяй райононь Братеница велень стеласа. Велень фкя курось каннесы сонь лемонц.
Первомайскяй и Темникав ошнень куросна лемдевихть Советскяй Союзонь Геройть С. В. Астраханцевонь лемса.
Саратов ошса средняй общеобразовательнай 23-це № школась каннесы С. В. Астраханцевонь Советскяй Союзонь Геройть лемонц^[1].

Литературась

Герои Советского Союза: Краткий биографический словарь / Пред. ред. коллегии И. Н. Шкадов. — М.: Воениздат, 1987. — Т. 1 /Абаев — Любичев/. — 911 с. — 100 000 экз. — ISBN отс., Рег. № в РКП 87-95382.
Геройская быль: Очерки и зарисовки о Героях Советского Союза — уроженцах Мордовии / сост. В. С. Иванова, А. Д. Ширяев. — Саранск: Мордовское книжное издательство, 1985. — С. 38—41. — 376 с.
Тюльников Л. К., Басович Я. И. Герои Советского Союза — горьковчане. — 2-е изд., перераб. и доп. — Горький: Волго-Вятское книжное издательство, 1981. — С. 17. — 366 с.
За Отчизну, свободу и честь!: очерки о Героях Советского Союза — горьковчанах: в 7 кн. — Горький: Книжное издательство, 1978. — Т. 5. — С. 30—36. — 368 с.