Авань поза

Авань поза (тяфта жа авань брага, авань пия) (руз. Праздник национального напитка) – мокшень кунардонь илась, кона ётафневоль видемда инголе азорава ваныхнень (Шкайть лездыензон) лемс.

Ётафнемац-васьфнемац

Эрь кизоня велеряйхне кочкальхть-путольхть азорава, конань кудса сяльде тиельхть илань поза. – мокшень кунардонь илась, кона ётафневоль видемда инголе азорава ваныхнень (Шкайть лездыензон) лемс.

Эрь кизоня велеряйхне кочкальхть-путольхть азорава, конань кудса сяльде тиельхть илань поза. Авань позас пуромкшнесть рьвакс туф аватне, озондсть шкайхненди цебярь урожаень колга, эсь семьяснон цебярьста эряфснон-ащефснон колга. Меле ётафнесть марстонь ярхцамбяль: обязательна пицесть почфста шоряф ярхцамбяльхть и ям, каннесть алхт, кши, пуре, поза (мархтост пркснезь видефнень, жувататнень, ломаттнень, штоба сяда лац касольхть и раштальхть). Тя иласа аватне примсезь эсь ёткозост аф кунара рьвакс лисьфнень (мекольце братчинаста).

Пиравамать аделсезь поза мархта кукшенть кенярдезь-шназь ётафтомаса лия кудс, коса сай кизоть тя обуцясь поладови нинге. Пяденцяста ётафнельхть пазмора, коса аватне эняльдсть Шкайти максомс сембонди шумбраши, паксянь и перень козя сёронь шачема-касома.

Ёткшиста иланди печксельхть уча, тиендельхть илань ярхцама шабатненди. Ярхцамда меле синь каванякшнезь (симнелезь) позада.

Недляшиста тиенделезь "Авань поза" илать. Велень кочкаф азоравась тернезень сембе велеряйхнень илати (эрь кудста теенза макссельхть очижинь ал).

Илада инголе тага морафнесть пазмора и озонкшнельхть.

Кда кудса ульсь од рьвяня, теенза эрявсь сюконякшнесть сире велеряйхненди.

Тяниень пингоц

Тяниень пингть Авань позас пцтай аф пуромкшнихть. И, кда и пуромкшнихть, то аньцек стак кенярькшнеманкса и лятфнеманкса. Сембе сяка и кунардонь пингть и тяниевок эрь велес авасьфнезь и ётафнезь тя илать эсь лацост. Инголи илась ётнесь келиста, праздновандавсь сембе велеса. Организациять правац эрь ульцяса макссевсь кудста кудс. Теенза аноклай аватне ушеткшнесть сёксендакиге. Сахарнай якстеряпсонь, аф фкя лацонь тишень и розень почфонь сускопнень эзда тиендевсть цюкорнят, конат аф фкя ши косьфневсть пянакудса и ванфтовсть сяльде котфонь кяскавса, коське вастса, тундати молемс. Инь эрявикс анокламась ушеткшнесь илада инголе колма шида инголе, шуваланяста. Азоравась, кинь очереденцты савсь ётафнемс мероприятия, тернезень эсь ульцянь сембе аватнень. Марстонь озкста меле, аватне анокласть сусла, нолдамок тевс пидеф цюкорнятнень и розень почфста натуральнай шапафтомать. Симомбяльсь шарондсь шуфтонь боцькаса (лагунаса) ёткшити самс.

Ёткшиста ушеткшнесь тердемань тевсь. Пянакудса цюгутт, ульцяса тол вельхксса, шуфтонь боцькат, шиньф и мезьсовок аф тапави симомбялень шине. Иляденди анок сядот литра шобда-коричневай туста танцти шиненя мархта позать. Ульцяса кочксевсть шрат, вярьгок вастса ащесь «алачинась» — суронь ямста, алста и модамарьста ярхцамбяльсь. кунардонь пинкнень тя ульсьинь танцти ярхцамбяльсь.

Недляшиста рана шобдава, азоравась, национальнай щамса тернесыне шабранзон: Христос Воскресе! Сада Авань позав. И васенцекс тага пуромкшнихть аватне, конат ни наряжафт, мазы национальнай щамса. Служайхть молебетт, васенцекс варчсесазь симомбяльть и лихнесазь ульцяв. Тоса жа кочксевихть шрат. И тяни эрти ули кода поладомс илати. Позань таньфть варжамац, гармошкань коряс кштиматне, народнай мокшень моротне, конат морафт лама вайгяльса-илась мольфтеви шиньберьф. Илять лагунць — симомбяль мархта кядьгось — торжественнайста, кши-сал мархта, Очижинь праздничнай тропарень моразь ётафневи шабра куду, коса васьфтьсы инжиень кельги азоравась. И тага марстонь озкс, конань пингста анайхть сетьмоши кудти, од кизоста цебярь урожай и пара эряф.

Лятфтамат

Литературась

• Евсевьев М. Е. Братчины и другие религиозные обряды мордвы Пензенской губернии(руз.) // Избранные труды : сборник. — Саранск, 1966. — Т. 5.
• Корнишина Г. А. Традиционные обычаи и обряды мордвы: исторические корни, структура, формы бытования.(руз.). — Саранск, 2000.
• Евсевьев М. Собрание сочинений, Т. 5 Мокшень рвяямась. Саранск, 1966.
• Девяткина Т. Мокшень эди эрзянь мифологиясь. Энциклопедие. 3-це нолдамась. - Саранош, 2007. Кялень латцихне: Надейкина Татю, Венчакова Аню
• Harva U. Die religiosen Vorstellungen der Mordwinen. Helsinki, 1952. N106-108

Ссылкатне

• Функционально-смысловое значение ритуальных трапез в традиционной культуре мордвы