Школань щамсь Россияса
| Школань щамсь Россияса | |
|---|---|
 СССР-са 1975-1976-це кизонь кучка класса тонафнихнень школань щамсна | |
| Тевс нолдама вастсь | Тонафнемань васттне |
| Эвондама шиц | 1834 |
| Эвондама вастоц |
 Российскяй империя,  СССР, Россия |
Школьнай щамсь Россияса руз. Школьная форма в России — щапне, конатнень тонафнихне каннесазь средняй, средне-специальнай и средне-профессиональнай образовательнай учреждениятнень эса улемстост. Аерды эрь шинь щапнень эзда и ладяви эрявикс ГОСТ-ть мархта иттненди щамонь аф пельксшинь пряфкс вешфкснень коряс. Россияса апак ладяк школьнай фкя формань кепотькс. Эрь школаса ванфневи эсь лацонь стильсь, фасонць, тюссь и символикась, конань кочксесы тя или тона образовательнай учреждениянь администрациясь[1].
2025-це кизонь -це июльста Россияса сувась вийс школьнай формань ГОСТ-сь. Эсонза, кепотьксонди, тяшкстави, што формась должен улемс малакс советскяйти, улемс мазыкс, удобнайкс, эсонза аф нолдави «од ломанень объединениятнень аф формальнай асоциальнай» символикасна, кона «терди вятемс пря правилатнень карша». Государственнай и патриотическяй символикать, меколанкт, мярьгонди [2].
2025-це кизоня 6-це августста Минпросвещениясь няфтсь российскяй школьникненди формань-щамонь од стандартт. Производительхненди, конат няфнесазь продукциять кода школьнай форма, эряви кирдемс ГОСТ-ть[3].
Школьнай щамсь Российскяй империяса
1834-це кизоня Николай I кемокстазе Российскяй Империяса гражданскяй мундирхнень марстонь системаснон, тяконь лувксса и тонафнемань средняй заведениятненди. Тонафнемань средняй заведениянь (гимназиянь и прогимназиянь, афкуксонь училищань, ошень училищань (школань) (1912-це кизоста сявомок — высшай народнай училищань) и коммерческяй училищань ) тонафнихнень щамсна шарфтоль военнайти — ся, мезе лемневсь ся пингть « аф ламода гвардейскяй шик»[4]. Синь кеписна и картузсна, понкссна и пальтасна, шинельсна и мундирсна-полукафтатне ульсть малат фасон коряс — сяда меле, и панархне-блузатне-гимнастеркатне — явондсть тюсса, кантса, пуняса и эмблемаса.
Формать марстонь видоц полафневсь аф весть. Гимназиянь щамсь ульсь сенем сембе тюсса (1870-це кизоти самс— шобда-сянгяря). Башка щам макссевсь и лия типонь образованиянь средняй заведениянь тонафнихненди — афкуксонь и коммерческяй училищатнень, велень хозяйствань училищатнень и стак тов, коса ульсть сяка конструкциянь и кроянь паршихне, но аф фкатольхть униформань тюсне, приборть тюсоц, канттне и стак тов. XX-це векста обмундированиянь ламоц пялькснень тиемасна (сембода пяк козя училищаса, коса тонафнесть аф козят) путовсть стамань фабрикатнень и кустарнай предприятиятнень потокс. Щамонь кой-кона пяльксне ульсть азфт аф обязательнайкс. Тя лездсь сяда уцезгофтомс формать, хоть и тя случайста унификациясь и кепотькснень мельге молемась ульсть пяшксет аф фалу. Ужяльдезь сай пингонь касомати щамонь рамайхненди ёню инженерхне-технологтне арьсесть ожазост (манжеттнень фтала) и брюкасост кадондомс котфонь пакшт. Средняй учебнай заведениянь тонафнить кядьбеса ульсь вазнянь кедень ранецсь или портфельсь (аф питни вариантсь — «тюленень»).Оцю класснень эса (сембода пяк авань гимназиятнень) книгатнень и тетраттнень каннекшнезь кяскавняфтома, крёскакс сотф кафта кедень килькшкса.
XIX-це векть песта гимназисттнень, кода и империянь тонафнемань средняй заведениянь ламоц тонафнихнень эрь шинь щамсна ащесь сенем тюсса сукнань гимнастёркаста (центральнай и кельме ширдень губерниятнень эса) (фотографияса панархнень котфсна сидеста няевихть картузкать коряс сяда шобданяста) колма сиянь лисьф пунятнень лангса вярде алу пункстамка мархта, зепефтома (меле — фкя мяштьса) карксаф равжа лакированнай шнань карксса (суманьца) сиянь пряжка мархта (бляхой), коза серматфтольхть и архтфтольхть равжа краскаса сяка букватне и цифратне, мезе и пряс щамань эмблемать лангса, но тарадфтома. Башка мазышикс лувондовсь пряжкать сядонга аруяфомац. Понкссна гимназисттнень равчтольхть или шобда-сенепт, кантфтома. Кямосна равчтольхть, шнурок мархта. Кизонда гимназисттне каннесть «тёждя обмундирования» — юрсонза ульсть сиянь пуня мархта коломаняковай гимнастёркат. Кой-кона гимназиятнень эса, кода фалу, южнай губернияса, уставсь мярьгонць блускат и уле тюсонь брюкат.
1910-це кизоста сявомок (Мировой васенце войнада инголе и сонь васенце кизотнень) алянь гимназиянь гимназисттненди тифтольхть военнай анокламань и гимнастикань элементт. Аньцек кодамовок специальнай спортивнай форма ашель — занятияса гимназисттненди мярьгондевсь улемс «гимнастическяй панарса» (сяка жа гимнастеркаса).
1914-це кизоста сявомок воявай армиять ширенц мяльса кирдезь оцю классонь ламоц гимназисттне (сембода пяк покодсть госпитальса или земскяй учрежденияса) ушедсть каннема офицерскяй кройса хакань тюсса гимнастеркат и френчт, бриджатне и кямотне английскяень лаца шнуровкаса или крага мархта.
XIX—XX векнень ёткса оцю классонь тонафнихне и гимназисттне ашесть яксе блузаса-панарса или гимнастеркаса, а аньцек ащи воротник мархта галунафтома кительса, мяштень зепфтома, марстонь конструкциясна шарфтсть мундирхнень лангс.
1917-це кизоть самс гимназисттненди ванфтовсь и мундирснон — шобда-сенем, вейхкса сиянь пуня лангса фкя бортса полукафтан, (кафта-обшлагса, ниле-фталце зепса), сиянь галунца тиф воротник мархта, кона стафоль эрь шинь курткать лаца, но эздонза аф ламода сяда кувакат. Мундирсь кондястсь параднай иланди или визитонди. Козя гимназисттне каннесть акша атласнай алгакс мархта мундирхт.
Авань щамсь. Стирнятненди ульсть ниле школат: Мария Императрицань учреждениянь ведомствань гимназият, народнай просвещениянь министерствань ведомствань училищатне (1862-це кизоня лемтьфтольхть гимназиякс), частнай гимназиятне, велень школатне. Авань гимназиятнень эса васенцеда обязательнай щамсь эвондась 1764-це кизоня, мзярда формась и сонь тюсоц кемокстафтольхть «Кафта сятт благороднай стирень касфтомань уставса»[5]. Велень школатнень эса, коса марса тонафнесть цёранятне и стирнятне, формась ашезь сувафнев.
Школьнай щамсь СССР-са
1918-це кизоня революцияда ингольдень Россиять гимназическяй формац лоткафтфоль Марстонь трудовой Советскяй школать видеса. «Классовай тюремать» ширде сире формась лувондовсь высшай сословиятненди кандомань символкс (ульсь нльне сентиментальнай стирняти обжай лем – «гимназистка»)[6].
1935-це кизоня правительствать постановленияц тиендсь школьникненди щамонь фкя форма. Школьнай формать арьсекшневсь сувафтомс 1936-це кизоста сявомок васендакиге Москувонь, Ленинградонь, Киевонь, Харьковонь и Минскяень школатнень эса. 1938-це кизоти тя арьсемась стаки ашезь тиев, РСФСР-нь просвещениянь народнай комиссарсь 1938-це кизоста сёрмасонза эняльдсь 1938-це кизоня IV кварталста нолдамс Москувонь и Ленинградонь тонафнихненди фкя щам. V—X-це классонь цёранятненди пялес понань шевиотста шобда-сенем тюсса гимнастёрка и равжа тюсса сукнань понкст, пряжка мархта шнань каркс, картуз, кямот и шинель, а стирнятненди —хлопчатобумажнай котфста шобда-сенем тюсса панар и равжа тюсонь инголькс.
1940-це кизоня сёксенда ульсть тифт эсь лацонь школат, конат сувсесть СССР-НЬ СНК-ть видеса трудовой резервань Главнай управлениянь системати, (ШФЗУ-нь, ФЗУ-нь) фабрично-заводонь школада вельф, и эсь ётковаст од ломатть, кит повсть среднеобразовательнай школань, вузонь, военнай училищань, средняй училищань оцю класснень ёткс и стак тов. Ремесленнай, кшнинь кинь училищатненди и ФЗО-нь школань тонафнихненди форменнай щамонь сувафтомась васенцеда ванови 1 4.10.1940 кизоть эзда СССР-нь ГУТР-нь начальникть 1 № приказонц коряс.[7]
ФЗО-нь школань тонафнихненди форменнай щапне васенцеда ладяфтольхть СССР-нь СНК-ть и ВКП(б) - нь ЦК-ть 204 № постановленияснон коряс 27-це январьста 1941-це кизоня «1941-це кизоня фабрично-заводской тонафнемань школатнень эса трудовой государственнай резервонь анокламать коряя вельф максомань мератнень колга». 1941-це кизонь 27-це мартста ГУТР-нь оцюнять 202 (6), 204 (7), 206(8) № приказонзон мархта форменнай щапнень колга сембе вяре азф положениятне келемкшнесть Литовскяй, Латвийскяй и Эстонскяй ССР-тненди, а цють сяда меле, 1941-це кизонь 19-це майста ГУТР-нь оцюнять 348 № приказса и Молдавскяй ССР-ть лангс. 1944-це кизоня специализированнай ремесленнай училищатненди (панда лангонь промышленностень, равжа металлургиянь и стак тов) сувафтфтольхть эсь лацонь лиянди аф моли тяштькст — картузть лангс кшнинь штамповандафне и ожаки лангса кодафне (сяда крхкаста ванода.:[8]). Лиссь стане, што васенцекс СССР-са формаснон щазь аф общеобразовательнай школань тонафнихне, а специализированнай профессиональнай тонафнемань заведениятнень эса— тяка пингть, средняй образованиянь «обмундированиянь» тя опытсь ульсь ётафтф марнек государственнай ярмакнень лангс.
1947-це кизоня удалась сувафтомс фкя школьнай форма[9]. Сон ламода мольсь классическяй гимназиянь формати — тюсть, стамать, аксессуархнень коряс. Революцияда ингольдень формать лаца школатнень эса тонафнихнень од формасна ульсь ярмак лангс (тяка пингть цёранятненди щамсь виде туфталонкса ульсь сяда питни) и тонафнихне рамсезь эсь ярмакснон вельде. Васенда стирнятнень ульсь равжа мархта классическяй коричневай панар (стакшинь) или акша (параднай, иланди) фартук, кона сотневсь фталу бантокс. Школьнай панархне аф пяк мазоптфтольхть, ульсть кружевань валхневи сивонят и манжетт. Сивоть и манжеттнень каннемасна ульсь обязательнайкс. Тянди полатксонди стирнятне каннесть равжа или коричневай (стакшинь) или акша (параднай) бантт.
1962-це кизоня 1-це сентябрьста тонафнихне тусть школав од формас— картузфтома, оцю пряжка мархта карксфтома, гимнастеркафтома.Стирнятненди щамсь пцтай ашезь полафта. Цёранятненди мярьговсь фкя бортнай пялес понань уле тюсса колма равжа пластмассовай пуняса пиджак, понксне сташендовсть пиджаконь тюссонь котфста. Мзярда ушеса ульсь пси мярьгондевсь каннемс кирьфтаф бриджат и шортат.
1970-це кизоня примафоль средняй общеобразовательнай школать уставонц колга Постановлениясь, конань коряс «Общеобразовательнай школань тонафнихненди латцеви щамонь форма, кона кемокстави союзнай республикань Министрань Советть мархта»[10]. 1975-це кизоня РСФСР-нь Министрань Советсь кемокстазень формань од варианттнень: стирнятненди сон лядондсь ингольцекс, а I—VIII классонь тонафнихненди-цёранятненди кочкаф кели брюка и спортивнай типонь куртка мархта вариантт[11].
1980-це кизоть омбоце пялестонза сувафтфоль оцю классонь тонафнихненди од форма. Тя формать, кда ули мялец и уликсшиц, мярьгондевсь каннемс кафксоце класста сявомок, но оцю класса тонафнихненди ашезь кардав каннемс сире образецень формать. Васенце класста сявомок сисемце классти молемс стирнятне каннесть кода и ингольдень пингть, коричневай панар, виде, платьясь арась аф ламода сяда сери плманжанзон коряс. Ёмла и средняй школань цёранятнень формасна лядсь апак полафтт.
1990-це кизотнень пионерскяй галстукнень и октябрятскяй значокнень, а тяфта-жа комосомолонь тяштенятнень каннемасна арасть свободнайкс и сембе вастова лоткафтовсть. Прокс тя лоткафтовсь 1991-це кизонь 1-це сентябрьста. Сяка кизотнень кой-кона советскяй школатне, конат ащихть прибалтийскяй республикатнень и СССР-ть фтала воинскяй гарнизоттнень эса полафтозь школьнай щамонь обязательнай каннемать. Афкукс обязательнай щамсь лоткафтфоль 1991-це-1992-це тонафнемань кизотнень (москувонь школатнень эса 1991-це кизонь 1-це сентябрьста сявомок новлямс ашезь эряв, но мярьгондевсь). Сембе сяка закононь коряс школьнай щамонь каннемась лоткафтовсь колма кизода меле.
Российскяй Федерациясь
Российскяй Федерацияса школань формань каннемась лоткафтфоль 1994-це кизонь тунда (1992-це кизонь 1-це июньцта предприятиятнень лоткамаснон и машфтомаснон инкса, конат тиендезь сонь фактть коряс).2013-це кизонь 1-це сентябрьста школьнай формась ульсь одукс сувафтф, но марстонь правилань порядкаса.
2022-це кизоня Сергей Кравцов азозе, што арьсекшни нолдамс тевс школьнай марстонь формать, но тонафнемань заведениятнень администрацияснон ули правасна арьсемс, кодамкс сон кармай [12].
2025-це кизонь 1-це июльста Россияса сувась вийс школьнай формань ГОСТ-сь. Эсонза корхтави, што формась канни светскяй характер, мазы и цебярь, тейнза аш кода нолямс "асоциальнай аф формальнай од ломанень объединениятнень» «пропагандирующай противоправнай прянь вятемань» символика. Государственнай и патриотическяй символикать, меколанкт, мярьгонди [2].
2025-це кизонь 6-це августста Минпросвещениясь няфтезе российскяй школьникненди формань од стандартть. Производительхненди, конат лемнесазь тифснон кода школьнай щам, эряви кирдемс ГОСТ. Вешфкснень коряс, школьнай формань стильти эряви улемс деловайкс, покройти — удобнайкс. Российскяй Федерацияса тя васенце тяфтама стандартсь. Сон макссеви общай, основной и средняй образованиянь учреждениянь ученикнень щамснонды[3]. Просвещениянь Министерстваса азозь, што аф ёрайхть сувафтомс школьнай фкя форма, тонафнемань заведениятненди ули кода эсь вешфксснон коряс латцемс ученикнень щамснон[13].
Лятфтамат
- ↑ Владимир Емельяненко. Госстандарт на школьную форму будет введен в конце 2024 года. Российская газета (6 августста 2023). Дата обращения: 8 сентябрьста 2025.
- ↑ 1 2 Появился полный текст ГОСТа с требованиями к школьной форме, РБК (29 июньцта 2025). Дата обращения: 30 июньцта 2025.
- ↑ 1 2 Минпросвещения показало новый стандарт школьной формы, РБК (6 августста 2025). Дата обращения: 8 сентябрьста 2025.
- ↑ Хорошилова О. «Синяя говядина»… Дата обращения: 8 сентябрьста 2025. Архивировано из оригинала 17 ноябрьста 2015 года.
- ↑ Устав воспитания двухсот благородных девиц учрежденного ее Величеством государыней императрицей Екатериной Второй, самодержицей всероссийской, матерью Отечества, и прочая и прочая и прочая. — Санкт-Петербург, 1764.
- ↑ История школьной формы // Планета школ
- ↑ Токарь Л. Н. Форма одежды учащихся ремесленных, железнодорожных училищ и школ фабрично-заводского обучения (1940—1941 год)// Мундир. — 2011. — № 1(3)
- ↑ Токарь Л. Н. Знаки различия специализированных ремесленных училищ (1944 г.)// Мундир. — 2010.- № 2(2)
- ↑ Волков А. М. Проект введения форменной одежды для учащихся средних школ в городах Москве и Ленинграде (1938 год).
- ↑ Постановление от 8 сентября 1970 г. N 749 об уставе средней общеобразовательной школы.
- ↑ Е. Соловьева. Школьникам — новую форму // Народное образование : журнал. — 1975. — С. 63.
- ↑ Единая школьная форма в России 2025-2026: суть законодательной инициативы, какой будет форма, когда введут (8 сентябрьста 2025). Дата обращения: 6 августста 2025.
- ↑ Минпросвещения не планирует вводить единую школьную форму, РИА Новости (6 августста 2025). Дата обращения: 8 сентябрьста 2025.
Источникне
- История школьной формы в России
- Как менялась школьная форма
- Королев С. Б. Форменная одежда для воспитанников технических железнодорожных училищ Министерства Путей Сообщений (обр. 1887 г.) // Мундир. — 2011. — № 1(3)
- Королев С. Б. Форменная одежда учеников средних сельскохозяйственных и садовых учебных заведений (обр. 1894 г.) // Мундир. — 2012. — № 2 (8)
- Ривош Я. Н. Время и вещи: Иллюстрированное описание и аксессуаров в России конца XIX — начала XX в. — Москва: Искусство, 1990.
- Токарь Л. Н. Знаки различия специализированных ремесленных училищ (1944 г.)// Мундир. — 2010.- № 2(2)
- Токарь Л. Н. Форменная одежда и знаки различия студентов индустриальных техникумов и учащихся специальных ремесленных училищ // Мундир. — 2013. — № 1(10).
- Токарь Л. Н. Форма одежды учащихся ремесленных, железнодорожных училищ и школ фабрично-заводского обучения (1940—1941 год)// Мундир. — 2011. — № 1(3)
- Борисов С. Б. Женские гимназии в России как исторический и социокультурный феномен. — Москва; Берлин: Директ-Медиа, 2018.