Содама ёфкс
Содама ёфкссь — тя кизефкс, кона фалу веши ответ. Сон нюрьхкяняста азонды кодама-бди уликсть или явлениять колга, кона эряви содамс.
Содама ёфкснень тонафнемасна
Васенцеда содама ёфксне руз. (загадки) печатлафтольхть "Образцы мордовской народной словесности" сборникса, кона лиссь 1883-це кизоня Казань ошса[1]. Тяса максфоль 80 содама ёфкс и ётафтфтольхть рузонь кяльс. Сяда тов нолдафоль финнонь учёнайть Хейкки Паасоненонь "Образцы мордовской народной литературы" (1894) сборникоц, коса максфоль 416 содама ёфкс эрзянь кяльса. Паасонен кочксесь 505 мокшень содама ёфкс, но синь печатлафтольхть аньцек Великай Отечественнай войнать аделамда меле 1947-це кизоня, мзярда аноклафоль фольклорть коряс мекольце 4-це томсь "Мордовская народная мудрость". Сембода лама кочкафоль содама ёфкста, конат ванфтовсть Я. М. Пинясовонь, В. К. Радаевонь, К. Т. Самородовонь рукописнай фондсост тяниень Гуманитарнай наукань научно-исследовательскяй институтса[2]. Содама ёфксснень тонафнемост наукань ширде васенцеда ушедсь Л.С.Кавтаськин, 1947-це кизоня сон сёрмадсь "Заметки о мордовских загадках" статья. Васенце сборниксь мокшэрзянь содама ёфкснень коряс рузонь кяльс ётафтозь лисендсь 1964-це кизоня, кочкайсна К. Т. Самородов.
Кодамот эрсихть содама ёфксне?
Мокшэрзянь содама ёфксне кода поэтическяй произведеният эрсихть колма видонь. Ёткстост инь сидеста васьфневихне - содама ёфксне-метафоратне:
Аф ярхцай, аф сими, а шинек-венек арды (Ведсь).
Улихть содама ёфксть-задачат:
Мольсть миртть-рьват да акат-пяльнет, да базясь овонц мархта. Мзяронест сембоц? (Колмонест)
Кафта тядят, кафта акат-сазорхт, да бабанясь уноконянц мархта. Мзяра ульсь эздост? (Колма)
Улихть содама ёфкст-кизефкст:
Мезсь меленця шарфты? (Вармась)
Мезть лангс ванозь сокоргодат? (Шить)
Вармань каршес мезе аф ёрдави? (Толгась, ювсь)
Литературась
- Образцы мордовской народной словесности. - Казань : издание Православнаго миссионерскаго о-ва, 1882-1883. Вып. 2: Сказки и загадки на эрзянском наречии мордовскаго языка с русским переводом. - 1883. - 308 с.
- Устно-поэтическое творчество мордовского народа. Т. 4, книга 1. Пословицы, присловья и поговорки / Науч.-иссл. ин-т. яз. лит., истории и экономики при Совете Министров Мордов. АССР. — Саранск, 1967. 375 с.