Од кизонь шрась

Рувики лопаста
Мандаритт
Оливье
Од киза, графинца фруктат

Од кизонь шрась – ламонц странатнеди ащи Од кизонь васьфтемань пяльксокс, кона ламода яви ломаттнень эряма вастснон и койснон инкса. Од кизоть васьфтемац яви кизонь лувомаса, коень эрь кодама налхкомаса, койса-обуцяса, щамса, а тяфта жа илань ярхцамбяльса[1]. Индуистскяй, китайскяй, коптскяй, еврейскяй, исламскяй ковгярькснень коряс Од кизось васьфневи аф григорианскяй ковгярьксова, но эрь коса илань шрась аф фкя лацонь. Шрась уленди стакшинь, кочкаф, коень, козя, сивольфтома и стак тов; может ащемс тол лангса пидеф ярхцамбяльста, эрь кодама пиццаста; ярхцамбяльста, конань кандозь ижихне (потлак, англ. potlak) и стак тов.

Эрямопингоц[петнемс | Петнемс лисьмапрянц]

Од кизонь шрать историяц кемоста сотнеф эряйхнень обуцяснон мархта. ХIХ векста европейскяй ламонц странатнень эса арась содавиксокс салатсь, кона эзонза керсефнень мархта коре малаль «ор ала сельдь» салатти. Калсь ульсь уцез, ашу ремесленникненди и видихненди-сокайхненди ульсь кода сонь рамамс, а перень сёротнень ломаттне касфнезь синць. Селёдкань норвежскаяй салатсь сувафтовсь англань 1845-це кизонь пидемань-панемань книгас. Германияса лангозонза шары салат тиендевсь лия продуктаста, ярхцамбяльть путнезь шра лангс вайса апак петть. Россияса тяфтама салатсь эвондась XIX векста пцтай тяка жа ингредиент мархта: пидеф модамарь, кал, якстеряпс и пурьхкя[2]. Кда Россияса, ладяф коень коряс, праздновави Сире Од кизось, то ЮАР-са тяшкстави омбоце од кизось, кона сотнеф историческяй событиять мархта — кизоньберф уретне покодсть илафтома и ваймамошифтома, аньцек тя шиня тейсть мярьговсь ваймамс. 2-це январьста тейст ульсь кода ваймосемс, анокламс илань шрат, якамс инжендама, тяда башка ошень и посёлкань куротнень эса мороса-кштимаса синь азондкшнезь люпштайснон карша мяльснон. Пингонь ётазь койсь сядонга келемсь и тячиень шис Кейптаунть курованза мазы щамса, кайги мора, вяшкома, эрь кодама тюсонь зонтик и лия парши мархта ётнихть 13 тёжятьда лама участникта[3].

Од кизонь менюсь

[петнемс | Петнемс лисьмапрянц]

Койхне[петнемс | Петнемс лисьмапрянц]

Оцязоронь Россияса од кизонь илань шраса башка васта занцесь рястаф пурхцкясь, кона лувовсь козяшинь и сёронь шачемань-касомань символкс (ульсть семьят, конатнень ашель тяфтама уликсшисна), ашезь мярьгондев ярхцамс нармоньда, арьсевсь, мархтонза кудста од кизоста лийкстай павазсь. XIX-це векть кучкаста тянди кемамась юмась, шратнень лангс кармасть путнема марь мархта мацихть и вирень нармотть. Коень коряс советскяй пингть од кизонь аноклаф шрать лангса ульсь шампанскяй, салатт: винегрет, «Оливье», «Ор ала сельдь», калонь и сиволень стюдень[4] и лия. Фруктатнень эзда мандаритт и марьхть, ламбамонди – конфетт и варения. Аноклакшнесть саразонь, яксяргонь, индюконь, мациень, куднумолонь сивольста эрь кодама ярхцамбяльхть, сускоманди (колбаса, сыр, якстере икра), а тяфта жа илань торт.

Кой-кона ярхцамбяльхне эвондасть од кизонь шрать лангса католикнень роштувань каванямаснон лаца. Лиятне, кепотьксонди «ор ала сельдь» руз.: «сельдь под шубой», ульсь арьсеф меколе, 1970-це кизотнень кучкаста[5]. Постсоветскяй пингть тейст нинге поладовсть сивольста лия ярхцамбяльхне — кепотьксонди, французонь лаца сиволь и лия салатт, конат няфнесазь тяниень пингонь лавкаса продуктань и ингредиентонь козяшить. Од кизонь шрати путневихть иретьфти, газированнай и аф газированнай симомбяльхть, фруктат, а тяфта жа эрь кодама ламбапт. Ламонц кудазораватне пидихть стюдень и тиендихть цёмарат.

Россиянь нароттне[петнемс | Петнемс лисьмапрянц]

Тюркатне и Кавказонь нароттне тяшкснесазь ковгярьксонь кафта илатнень и кафксть аноклайхть илань шрат: Од кизоста и мартть песта — Наврузста, конань тяшкснесазь семьянь келес, васьфнихть конакснон и мала ломаньцнон мархта. Илань шраса бешбармак, од боранняста туста шонгарям, цецявицань лепёшкат, губадия, урама, чак-чак и лият.

Буряттне, тувиницне и калмыкне тяфта жа кафксть аноклайхть од кизонь шра: 1-це январьста и февральста – Цаган Сар (Сагааг Сар, Акша Ков) илати, конанди коень коряс панихть «борцоки» пончикт ( тиевихть жуватань и эрь кодама паршиень лаца).

Ненецне од кизоть васьфнесазь тяфта жа кафксть — тялонь (ноябрьста) и кизонь (июньцта).

Якутияса Ысыах (Од киза) тяшкстави мзярошка ши, крьвяснихть оцю толмархт, пидихть лама сивольда, калда, ламбамбяльда, шарондыхть кядьта кундавста, морайхть и кштихть [6].

Карелияса сюндума илати од кизонь шрати аноклавихть вай лангса пуштф пярякат, шужень япт и пинемонь пачат.

Эвенкитне тяшкстасазь «Мучун» илать (пингть, мзярда одкстоптови модась), нганасаттне январть мекольдень шистонза февральть ушетксста праздновандайхть полярнай веть аделавоманц эса; ненецкяй илась — манинь васьфтема; энцне (200-та лама ломань) од кизоть аф тяшкстасазь, мартть песта синь ётафнихть «Ко позу» («Келувонь сёрма») ила, аруяфнемань обуцянь обряд, эрь участникти максови сярдонь сиволь. Од кизоня шрать лангс путневсь коень ярхцамбяль сэвэн — пидеф и ёмла сускомняс керсеф кенже мархта ракшань или офтонь куяв сивольхть, аньцек кундаф калста строганина, калонь лия ярхцамбяльхть, икра мархта копшанят, эрь кодама иможень приправат, кайсесть имошт эи лофцс [7]. Эвенкитне, конат эряйхть Колымаса (Дальняй Востокса, Магаданскяй областьса) тяшкснесазь од кизоть — Хэбденек (кенярьдема), кизонь шинь ащемаста. Долгантне васьфнезь манить лицеманц полярнай веда меле — Хейро илать, кона ушеткшнесь шобдава 5 частса.

Поморатне кунаркиге тяшкснезь Од кизонь илать 14-це сенябрьста (сире стилень коряс)[8]. Тяфта жа сентябрь ковста ётафневсть Маргаритинскяй ярмаркат[9], конат тяниень пингонь Россияса оду эвондасть 2001-це кизоня сентябрь ковста[10]. Тяниень пингть Архангельскяйса кизонь прважамань сёксень илась и Од кизонь васьфтемась ётни тяфта жа 14-це сентябрьста, лемдеви Поморскяй Од кизокс[11][12][13]. Од кизонди поморхне пицесть коень коряс ладяф ярхцамбяль-каваняма, кона содафоль XVIII-це векть ушетксста[14], — «сяванят» глазурьса архнеф сдобнай шапаксонь лапш прянканятне ( велеса синь лемневсть «сюронят», «тракскят», «сяванят», «бораннят»). Лемсна сотнефт формаснон мархта — сяда сидеста синь пицезь-панцезь сюру жуватань лаца (авань ронга, покаряв, тяштеня, нармонь и стак тов), синь ульсть шачемань-касомань эсь лацонь символкс: ков сяда лама прянкань фигурганяда, тов сяда шумбра ули кудонь жуватась и сонь раштафксоц. Койсь ванфневсь эрь семьяса, а 1960-це кизоня оду эвондась архангельскяй прянкакс. Соломбальскяй содаф мастерицать-козульщицать К.И. Карамзинать прянканза (1960-це — 1970-це кизотнень) няфневсть Государственнай историческяй музейса выставкаса, (1971-це кизоня) «Рузонь прянка» художественнай открыткань серияса. Тяниень пингть Архангельскяйса ётафневи «Северонь прянкань чуда» эрь кизонь выставкась[15].

Прянкат-козулят

Поморхне треска калть илань шрати путнезь лофцонь, лангонь и ваень воложама (соус мархта), тяда башка беломорскяй мидият, лофцоведьса шаньгат, калонь пярякат и кёж иможень симомбяль[16][17]. Пицесть по-пертомински[18] калонь шонгарям, прянкада башка панцть эрь кодама топа мархта шанежкат, колобат и калиткат»[19]. СССР-нь пинкнень Северонь нароттне сявондезь мяльс и советскяй илатнень — пцтай сембе Северонь нароттне Од кизоти аноклайхть илань шра: путнихть национальнай каванямат и коень коряс оливье салат и торт[20].

Статистикась[петнемс | Петнемс лисьмапрянц]

Од кизонь шрать лангс карьхцнень ванондсыне Росстатсь [21][22], а тяфта жа РФ-нь субъектонь региононь кой-кона статистическяй службатне[23]. Росстатсь сувафнесыне од кизонь менюнь тяфтама продуктатнень питнеснон: верокста коптиндаф колбаса, коптиндаф сивольхть, кал, икра, сараст, траксонь сиволь, вай, сыра, шоколаднай конфетт, апельситт, лимотт, банатт, перень сёрот, торт, коньяк, вина, сокт и газированнай ведь. Тяфта жа сон лувондсыне питнеснон регионга: сембода питни Од кизонь шрась Чукотскяй, Ненецкяй, Ямало-Ненецкяй АО-тнень эса и Камчатскяй крайса, сембода уцез — Калмыкия республикаса, Калининградскяй, Липецкяй, Белгородскяй и Омскяй областтнень эса[24][25]. Коень коряс Удмуртстатсь эсь ширдест лувондсазь од кизонь менют колма вариантонзон: простой, коень и козя[26].

  • Ашу семьятнень илань шрасна аноклави «Стаконь кочкаста», ков сувафтови самай кржа ярхцамбяльда: салу селёдка, винегретонди эрявикс пидеф сёрот, 1 килограмма апельситт и 1 бутылка водка.
  • Кучкаса ащи классонь семьяти «Коень кочкафксса» цёмарат, (оливье и винегрет) коень кафта салатт, пялес коптиндаф колбаса, сыр, сок, шоколаднай конфетт, торт, фруктань кафта витт и иретьфти кафта симомбяльхть.
  • Козяста эряй семьятнень «Козя кочкафксс» сувафтови марнек «коеннесь» и башка нинге сиволень и калонь эрь кодама танцти ярхцамбяльхть, лососёвай калонь икра, верокста коптиндаф колбаса, перень свежай сёрот, пяштть, ламбама эйня, фруктань и иретьфти симобялень колма витт[27]. Россиянь и СНГ-нь странань од кизонь шрань символкс лувохи «Оливье» салатсь и мандариттне [24]. 1970-це кизотнень кучкаста тя лемлувксть пяшкодезе «ор ала селёдкась»[28].

2000-це кизоть ушетксста эвондась тяфтама шарьхкодема, кода «индекс оливье», лувовихть салатти сувай породуктатнень питнесна. Сембода питникс лядонды оливьесь Чукоткаса, Ханты-Мансийскяй автономнай округса, салатти сувай продуктатнень питнесна кирсь, а 2021-це кизоня сембода уцезста сонь ульсь кода рамамс Белгородскяй областьса[29]. 2023-це кизоть песта «Руспродсоюз» ассоциациясь лувозе, што ниле ломаньцта ащи семьяти илань шрась стяй 5,5 тёжятть малава цалковайхть[30]. 2024-це кизоня ниле ломаньцта ащи семьяти илань шрас ярхцамбялень кочкафксть кучкань питнец пцтай 9,1 тёжятть цалковайхть. Марстонь межведомственнай информационно-статистическяй системать (ЕМИСС) уликсонзон коряс путомок каршек ётай кизоть мархта тядде питнетне кассть 13,5%[31]. ДРТ-ть кизефнемань уликсонзон коряс 2024-це кизоня Од кизоть васьфтеманцты Россиянь эряйхне ёрайхть карьхцямс 30,1 тёжятть цалковай. Бюджетста 44 % процентсь туй илань шрать анокламанцты, 40% - казненди, 16% - весялгодкшнеманди [32].

Европа[петнемс | Петнемс лисьмапрянц]

Данияса од кизонь шрати аноклаф коень ярхцамбялькс лувовихть снафне, конат арсихть ронгонь и духонь виень символкс, а тяфта жа марьхне — кельгомань и мазышинь символхне.

Францияса илань шраса трюфельхть, индейка и фуа-гра, а тяфта жа лама лия ярхцамбяльхть, сыра и ламбапт[33][34]..

Албанияса панихть суркс лаца койенди ладяф пяряка и плхневи поляна.

Польшаса Од кизоть васьфнесазь перень сёронь или пангонь шонгарямса, ямса и калса[35].

Чехияса коень ярхцамбяльхне перловкась и ямкссь, а тяфта жа марень пярякась[35].

Сербияса кучка вастть од кизонь шраса занцесы рястав пурхцкясь [35].

Италияса пидихть цецявица (сон козяшинь символ) тувонь сиволень колбаса мархта, тяда башка лазанья, кал, морепродуктат[36].

Испанияса од кизонь коень ярхцамбялькс лувовихть оцюведьса уенди сускомбяльхне, хамонць, сырхне, рисовай пудингсь, эрь кодама ламбапне [37].

Грецияса илань шраса шапаксста тиф сёрма мархта иможень и пяштень пярякась, кона лемдеви Василопита[38].

Великобританияса коень ярхцамбяльсь: перень сёронь гарнир мархта фаршированнай индейкась и ламбамонди пудингсь[39].

Швецияса илань шра аф аноклави, ломаттне од кизоть васьфнесазь ушеса: куроса и площадьса [40].

Ламбамнятне Од кизонь шрать лангса

Африка[петнемс | Петнемс лисьмапрянц]

ЮАР-са Басутотне кизоть ушетксонц праздновасазь августста, шрань ярхцамбяльсна — тинг ямсь, мала поленту ямть мархта, пидеви марса тапаф соргста, сураста и кукурузаста. Илань шиста пидеви букань пулоста шонгарям, рястави сиволь (браай) и пидевихть сараст, сембось путневи шра лангс шурькянь, пейшурьхкянь, чили перецькянь, помидорань соус мархта. Тозерть тиендсазь ярхцамбялькс, кона таньфса мала йогуртти. Лекебекоане — кукрузань почфонь цюкорнят. Мангаджане — косьфтаф перень сёрот, конат путневихть шрать лангс секокомогане эсь лацонь приправа мархта (тиф тапаф марулста, конань содаф пчкафты ширец). Перень сёротнень, тингть, сивольхнень и оцю ведьса уендихнень эзда ярхцамбяльхнень почерясазь танцти шиненя мархта специяса. Ярхцамбяльхнень симсазь соргань или имбирень кудонь пиваса. Пандонь велень кевонь куднятнень вельхксса либорди масторекотфне корхтайхть ярхцамбялень уликсшить колга: акша тюсса – кудса ули пива, ям и эсь пидеф-паньф ярхцамбяльхть, сянгяря – кудса лама перень сёрода, якстерь – менюса ули сиволь[41].

Азиянь Странатне[петнемс | Петнемс лисьмапрянц]

Китайса Од кизоти аноклайхть сараз, кал и сояста мичке. Странать кельмоширесонза ярхцайхть цёмарада, а лямбоширесонза — «няньгао» (педи рисста печфкят)[42].

Японияса од кизонь шрати путневихть кувака лапшат, морянь капста, снафт и пидеф кал, а тяфта жа моти — тапаф педи рисонь коень цюкорнят, конат пидевихть или пуштовихть тол лангса[35].

Шри-Ланкаса илань шраса башка васта кирибат — национальнай ярхцамбяльти, кона канды эсь эсонза религиознай смузь: сонь путнесазь аньцек оцю илатненди, шачема шиста, од кизонь ингольдень шиста и религиознай иласта[43].

Новогодний стол во Вьетнаме

Вьетнамса илань ярхцамбяльхне пидевихть рисста и сивольста.

Непалса Од кизоть тяшкснесазь апрельть кучкаста — Бискет Джатра иласта. Шрати путневихть индийскяй и тибетскяй кухнянь коень ярхцамбяльхне[39].

Индия[петнемс | Петнемс лисьмапрянц]

Индияса Од кизоть ингольдень шистонза тяшкстави «Бису кани» (англ. bisu kani) — илась, конань юронза тушендыхть ичкоздень векненди и ащи велень хозяйствань койхнень оду шачемаснонды символкс. Ломаттне, кона корхтайхть тулу кяльса, пуромкшнихть и тяшкснесазь од кизоть ушетксонц. Кой-кона региоттнень эса Дакшина-Каннаде Мангалураса, Касарагодаса, а тяфта жа Керала и Тамилнада штаттнень эса праздновави од кизоть ушетксоц[44]. Сон тяшкстави манинь ковгярьксова мартста или апрельста и максы уликсши сюконямс Тядяти-перьфпяльти. Фруктатне и перень сёротне — урожаень символхне— ванфневихть башка вастса и тейст сюконякшнихть.

Од кизонь шрать лангс путнихть фруктат и перень сёрот: баклажатт, куярхт, тиклат, грейпфруктт, бананат, пяштть , синь лувкссост и ареканутт (англ. areca nut), кокост, джамбу шуфтонь марьхть, манго, гарцииният, хеббаласут, конат тяниень пингста васьфневихть аф сидеста. Пидихть самбар (самбхар) цецявицаста перень сёронь шонгарям, бананонь ламбама оладтьят (англ. Banana Podi), тиихть фруктаста и перень сёроста лия ярхцамбяльхть. Тя шиня эряфкшу ломаттне бславасазь оттнень [45].

Хмонги[петнемс | Петнемс лисьмапрянц]

Хмонгатнень, Лаосса инь оцю этническяй группатне, конат тяфта жа эряйхть КНР-са, Вьетнамса и Тайландса[46] Од кизосна лемтьф пяшксе ковть кемгафтувоце ковть ковонь ковгярьксть коряс, няфтьсы ковонь Од кизонь ушедомать и канни лем «колмогемонть илац» (Ца Хаув Той) — од кизонь ушедома, мзярда хмонгихне тиихть казнет и од эряфонь пингть ушедоманцты [47][48][49].

Илась кемоста аф сотнеф ковгярьксти, сяс мес сотнеф сёронь урядамань пингть мархта и ётни ноябрьста или декабрьста. Тяшкстаматне молихть 30-нь ши (кой-кона странаса, кепотьксонди, США-са сон кирьфтавсь колма шида[50], тя пингть ломаттне якайхть ялгаснонды и мала ломаньцнонды инжикс, кудса аноклавихть коень ярхамбяль мархта шрат — илань эрь шиня шрать лангса эряви, штоба улельхть кемонь блюдат. Коень каванямакс лувови бан чунг (англ. ban chung) — тя рис, тувонь сиволь и пиже снав мархта, кона пидеви бананонь лопаса), [51]), сахаронь тростниконь сироп мархта рисонь цюкорнят, рястаф бананат[52] Илань шрати аноклавихть сиволень эрь кодама ярхцамбяльхть: семьятне илати печкихть тува. Эрь инжити макссихть пидеф ал и алонь рулеткя. Пиже папайаста салатть пяшкодьсазь пейшурьхкяса, чили перецса, тамариндса, лаймонь сокса, сахарса, черри помидораса и семботь валсазь калонь соусса, крабонь и креветкань пастаса. Специянь шоряфкссь томбави, а сяда тов шовордеви папайа и помидора мархта[48]. Тяфта жа пидеви бананань лопа лангса кал, салапао (перень сёронь и алонь шовафкс мархта слойкат), лаап (калонь фарш или танцти тише мархта кал и рисом), саразонь пильгоня мархта лапшань шонгарям и тол лангса пидеф сиволень лия блюдат[53].

Американь Соединеннай Штаттне[петнемс | Петнемс лисьмапрянц]

США-са од кизонь пряфкс ярхцамбялькс лувови топа мархта индейкась [35].

Австралия[петнемс | Петнемс лисьмапрянц]

Австралияса аш башка од кизонь ярхцамбяльхть. Ломаттне тол лангса пуштыхть сиволь и сосискат[38].

Кинематографияса и культураса[петнемс | Петнемс лисьмапрянц]

Од кизонь шрань ярхцамбяльхне няфневихть киноматографияса, телевиденияса и массовай культураса. «Эряфть лангсонк пеетькшнемац, или Банянь тёждя кожфкя!» руз.: «Ирония судьбы, или С лёгким паром!» кинофильмаста «Кодама аф танцти тон тя валф калце!» руз.: «Какая гадость эта ваша заливная рыба!» валхне арасть содавиксок сембонди[54][55]. Владимир Гиляровский «Москва и москвичи» книгасонза «На трубе» главаса ванфтозе салатть: «Лувовсь пяк цебярькс, мзярда ярхцамбяльхне аноклакшнезнь Оливье французсь поворсь, кона арась содавиксок арьсеф «оливье» салатонц мархта, мезьфтома обедсь аф обед и кода сонь тиендезе, киндиге ашезе азонкшне»[56].

Галерея

[петнемс | Петнемс лисьмапрянц]
  • Италия. Од кизось

    Италия. Од кизось

  • Од кизонь шрась Японияса

    Од кизонь шрась Японияса

  • Бутерброттне якстерь калонь алня мархта

    Бутерброттне якстерь калонь алня мархта

  • Од кизонь шрась, Россия, 2012-це кизось

    Од кизонь шрась, Россия, 2012-це кизось

  • Од кизось, фужерхне шампанскяй мархта

    Од кизось, фужерхне шампанскяй мархта

Лятфтамат

[петнемс | Петнемс лисьмапрянц]
  1. ↑ New Year's traditions: How do people celebrate the new year around the world? (англ.). bbc.co.uk. Дата обращения: 23 ноябрьста 2022.
  2. ↑ Селедка под шубой: история праздничного салата. www.culture.ru. Дата обращения: 29 ноябрьста 2022.
  3. ↑ New Year's Day in South Africa (англ.). Time and Date AS. Дата обращения: 29 ноябрьста 2022.
  4. ↑ Сколько можно хранить блюда с новогоднего стола? 2x2.su. Дата обращения: 29 ноябрьста 2022.
  5. ↑ История и рецепт знаменитого салата. ntv.ru. Дата обращения: 29 ноябрьста 2022.
  6. ↑ Таймыр: Новый год у коренных народов Севера. dudinka.city.online. Дата обращения: 29 ноябрьста 2022.
  7. ↑ Старцев А. Ф. Традиционная культура и питание дальневосточных эвенков в прошлом и настоящем // Россия и АТР : Научный журнал. — 2010. — № 1. — С. 60—69. — ISSN 1026-8804.
  8. ↑ Новогодние традиции народов России: поморы. Звезда Алтая. Дата обращения: 1 декабрьста 2022.
  9. ↑ Архангелогородская (Воздвиженская, Маргаритинская ярмарка), также Маргаритинская ярмарка, первую международная российская ярмарка. Администрация ГО "Город Архангельск". Дата обращения: 1 декабрьста 2022.
  10. ↑ Анатолий Беднов. Маркиз и Маргарита, или Как военный губернатор ярмарке имя дал. pastar.ru. Дата обращения: 1 декабрьста 2022.
  11. ↑ Маргаритинская ярмарка. Управление развития туризма министерства культуры Архангельской области. Дата обращения: 1 декабрьста 2022.
  12. ↑ Маргаритинская ярмарка. Архангельская областная научная библиотека им. Н. А. Добролюбова. Дата обращения: 1 декабрьста 2022.
  13. ↑ Анатолий Беднов. Архангельский общественник: Поморский Новый год объединяет людей. Дата обращения: 1 декабрьста 2022.
  14. ↑ Ирина Скалина. Зима в Архангельске пахнет пряниками. ТАСС. Дата обращения: 1 декабрьста 2022.
  15. ↑ Н. Филева. Архангельские козули. — Архангельский государственный музей деревянного зодчества. — Архангельск: Издательский центр АГМА, 1999. — P. [16—23] (col. 26). — (Народные ремесла русского Севера).
  16. ↑ Игорь Соколов. Парадоксы поморского питания. Кириллица. Дата обращения: 29 ноябрьста 2022.
  17. ↑ Поморская кухня: блюда, секреты. Этнопарк. Дата обращения: 29 ноябрьста 2022.
  18. ↑ Татьяна Буторина. Суровые русские викинги, рыболовы, первые путешественники – кто такие поморы. ФедералПресс. Дата обращения: 1 декабрьста 2022.
  19. ↑ Людмила Черёмухина. Старинный поморский Новый год. Двина Сегодня. Дата обращения: 1 декабрьста 2022.
  20. ↑ Алексей Черенков, Полина Петренко, Алена Скользина. Дед Мороз к ним не придет. Дата обращения: 29 ноябрьста 2022.
  21. ↑ В Росстате оценили стоимость новогоднего оливье. lenta.ru. Дата обращения: 29 ноябрьста 2022.
  22. ↑ Росстат: Новогодний стол россиян подорожает почти на 8 %. www.mn.ru. Дата обращения: 29 ноябрьста 2022.
  23. ↑ Воронеж оказался на 16-м месте в рейтинге стоимости салата «Оливье». moe-online.ru. Дата обращения: 29 ноябрьста 2022.
  24. ↑ 1 2 Росстат узнал, где новогодний стол дешевле. ppt.ru. Дата обращения: 29 ноябрьста 2022.
  25. ↑ Росстат узнал, где новогодний стол дешевле. www.eg-online.ru. Дата обращения: 29 ноябрьста 2022.
  26. ↑ Новогодний стол обойдется семье из Удмуртии в среднем в 1634 рубля. izhlife.ru. Дата обращения: 29 ноябрьста 2022.
  27. ↑ Росстат оценил стоимость новогоднего стола. mn.ru. Дата обращения: 29 ноябрьста 2022.
  28. ↑ Классический рецепт салата "Сельдь под шубой". ria.ru. Дата обращения: 29 ноябрьста 2022.
  29. ↑ Индекс оливье. ТАСС. Дата обращения: 30 ноябрьста 2022.
  30. ↑ “Стоимость новогоднего стола за год выросла на 9% - Российская газета”. Российская газета. 2023-11-20. Дата обращения 2024-11-13.
  31. ↑ “Cредняя стоимость продуктов для новогоднего стола составила 9,1 тыс. рублей”. AiF. Дата обращения 2024-12-01.
  32. ↑ На празднование Нового года большинство россиян планируют потратить до 30 тыс. рублей | Эксперт. Эксперт. Дата обращения: 4 декабрьста 2024.
  33. ↑ Les traditions du réveillon du Nouvel An en France (фр.). Ambassade de France à Copenhague. Дата обращения: 23 ноябрьста 2018. Архивировано 25 ноябрьста 2018 года.
  34. ↑ Ava Laboy Capo, 2013, с. 52.
  35. ↑ 1 2 3 4 5 “Праздник с любимым вкусом Какими блюдами встречают Новый год в разных странах мира”. Lenta.RU. 2024-11-13. Дата обращения 2024-11-13.
  36. ↑ “Новогодние рецепты. Что едят в Европе, чтобы разбогатеть”. РИА Новости. 2020-12-25. Дата обращения 2024-11-13.
  37. ↑ “Новый год в Испании: традиции, меню, подарки”. Коммерсантъ. 2021-12-15. Дата обращения 2024-11-13.
  38. ↑ 1 2 Дарья Тарасенко. “Съесть 12 виноградин в красном белье: как отмечают Новый год в разных странах”. Вокруг света. Дата обращения 2024-11-13.
  39. ↑ 1 2 Ирина Бадешко. 13 традиционных блюд, которые обязательно появятся на столах разных стран мира Источник: https://travelask.ru/blog/posts/5183-13-traditsionnyh-blyud-kotorye-obyazatelno-poyavyatsya-na-st. Дата обращения: 13 ноябрьста 2024.
  40. ↑ Интересные новогодние традиции разных стран и народов мира. 7dach.ru. Дата обращения: 29 ноябрьста 2022.
  41. ↑ John Jacobs. Lesotho Recipes Perfectly Blend A Variety Of Ethnic Traditions (англ.). diversityplus.com. Дата обращения: 30 ноябрьста 2022.
  42. ↑ “Китайский Новый год”. РИА Новости. 2024-02-10. Дата обращения 2024-11-13.
  43. ↑ Национальная кухня Шри-Ланки. nativa.ru. Дата обращения: 29 ноябрьста 2022.
  44. ↑ Karavali Samskruthika Chavadi To Host ‘Bisu Parbha’ In City On Apr.14 (англ.). Star of Mysore. Дата обращения: 29 ноябрьста 2022.
  45. ↑ Raviprasad Kamila. Bisu kani brings people together at Pilikula Nisargadhama (англ.). The Hindu. Дата обращения: 29 ноябрьста 2022.
  46. ↑ и в других странах. www.seattletimes.com. Дата обращения: 29 ноябрьста 2022.
  47. ↑ Cyril Eberle Hmong New Year (англ.). maptia.com. Дата обращения: 29 ноябрьста 2022.
  48. ↑ 1 2 Phyllis Louise Harris. Hmong New Year: A celebration of harvest, romance and food! (англ.). Twin Cities Enterprise. Дата обращения: 23 ноябрьста 2022.
  49. ↑ The Lao Hmong New Year in Luang Prabang (англ.). Explore Laos. Дата обращения: 23 ноябрьста 2022.
  50. ↑ The Hmong New Year (англ.). hmonglessons.com. Дата обращения: 29 ноябрьста 2022.
  51. ↑ Banh Chung for Lunar New Year Recipe (англ.). www.seriouseats.com. Дата обращения: 29 ноябрьста 2022.
  52. ↑ Thy Tran. Hmong New Year Festival (англ.). KQED Inc. Дата обращения: 23 ноябрьста 2022.
  53. ↑ Hmong New year in Laos (англ.). MEKONG CRUISES. Дата обращения: 23 ноябрьста 2022.
  54. ↑ Готовим заливную рыбу на Новый год. www.foodestet.ru. Дата обращения: 29 ноябрьста 2022.
  55. ↑ Это вкусная-вкусная заливная рыба. www.woman.ru. Дата обращения: 29 ноябрьста 2022.
  56. ↑ Ксения Карпова. Девять интересных фактов об оливье. teleprogramma.pro. Дата обращения: 30 ноябрьста 2022.

Литературась

[петнемс | Петнемс лисьмапрянц]
Сявф"https://mdf.ruwiki.ru/w/index.php?title=Од_кизонь_шрась&oldid=205257"-ста