Мялень пяшкодемань кузня

«Мялень пяшкодемань кузня»
Типсь	паронь тиемань акция
Пуроптома кизось	2018
Пуроптыенза	«Арьсек мархтон» проектсь
Ладяф
Ключевой фигуратне	Артур Орлов («Васенцетнень движениясна» правлениянь оцюнясь) Тимур Сафин («Васенцетнень движениясна» оцюнять советникоц)
Представительствац	«Васенцетнень движениясна»
Мезе тиенди	Паронь тиемась, Социальнай пяльде ширень кирдемась
Кочкаматне	4 млрд цалковойда лама (сембе пингста, 2025 кизоти)
Пожертвованиятне	120 тёжяньда лама участник (2025)
Эсь мяльс коре сувафнень лувкссна	20 тёжяньда лама (2025)
Эсонза ащи	1,5 тёжяньда лама партнёрскяй организация (2025)
Слоганць	«Од кизонь васьфтемась — тя туфтал тиемс ёфкс и лездомс сятненди, кинди эряви лезкс»
Сайтсь	елкажеланий.рф

«Мялень пяшкодемань кузня» (руз. Ёлка желаний)— россиянь паронь тиемань акциясь, кона водендаф иттнень, эряфкшуфнень и ограниченнай возможность мархта ломаттнень од кизонь мяльснон пяшкодеманкса. Ётафнесазь «Васенцетнень движениясна» Росмолодежть лезксонц вельде эрь кизоня 2018-це кизоста сявомок.

Тя проектса эрь ломанти («мялень пяшкодити») ули кода пяшкодемс эряфс мяленц лия ломанть («ёрамань арьсить»). Эсь улеманц пингста акциясь арась Россияса фкя инь оцю паронь тиемань инициативакс, пуроптомок марс марнек странаста мзярошка тёжянь участник и партнерскяй организация.

Эрямопингоц

«Мялень пяшкодемань кузня» акциясь арась «Арьсек мархтон» паронь тиемань проектть пяльксокс, кона ушедовсь 2014-це кизоня кода волонтёронь инициатива Татарстан республикаса. Мезенкса арьсефоль тя проектсь, васенцесь тя — стака урма мархта иттнень и эряфкшу ломаттнень пяшкотькшнемс мяльснон-арьсемаснон, казендемс казнекс аф паршихть-месть, а кенярдема, валда мяльхть-арьсемат. Васенцекс пяшкотьфоль фкя стирнять мялец, кона ёрась лиендемс самолётса, штурвал ваксса.

2018-це кизоня проектсь сувась «Россиясь — уликсшинь мастор» президентскяй платформати. Тяка кизонь декабрьста Москуса Доброволецнень народъётконь форумсост Россиянь президентсь Владимир Путин содафтсь проектть мархта и примась эсонза участия, пяшкодемок эряфс вете идень мяльхть-ёрамат. Курок од кизонь акциясь сявсь «Мялень пяшкодемань кузня» лем.

Васенце акциясь ётафтовсь 2019-це кизоть карша. 2018-це кизонь 27-це декабрьста Москувонь Кремляса, Государственнай Советть заседаниянц видеса, ульсть ладяфт од кизонь кузнят, конат мазоптфтольхть открыткаса, коса сёрматфтольхть мезе ёрасть иттне. Правительствав сувсихне, министрхне и губернаторхне поладовсть акцияти, валхнемок кузнятнень лангста шабань мяль-ёрама мархта шархнень и пяшкотькшнезь синь эряфс. Пингонь ётазь акцияса примасть участия государственнай лия деятельхне и коммерческяй организациянь представительхне, а стане жа лия ломаттне.

2022-це кизоста сявомок акциять ётафтыец — «Васенцетнень движениясна» организациясь.

Тевонь тиемась

Акциять инь оцю тевоц — казендемс кенярдема и од кизонь ёфксонь маряма. Участникне, «ёрамань арьсихне», кадондсазь эсь заявкаснон проектть официальнай сайтозонза. Синь мяльсна-ёрамасна эвондакшнихть виртуальнай или афкуксонь кузнятнень эса, конат ладяфт партнерхнень площадкаснон лангса.

Участникнень ёрайхнень-арьсихнень категориясна:

• 3 кизоста сявомок 17 кизос молемс иттне и 60 кизоста сявомок сире ломаттне;
• уроз шабатне и тядяфтома-аляфтома лятф иттне;
• ограниченнай возможность или инвалидность мархта шабатне и оцюфне;
• лавча шумбраши мархта шабатне, конатнень эряфсна нюрьги сюреня лангса;
• ашу семьяста иттне ;
• специальнай военнай операцияса улихнень семьяста иттне;
• шабатне, конат эряйхть Донецкяй и Луганскяй Народнай Республикатнень эса, Запорожскяй и Херсонскяй областтнень, а стане жа масторкитькс ваксонь региоттнень эса, конат повсть зиянц ляцендематнень эзда.

Участникнень арьсеф мяльсна-ёрамасна эрсихть материальнайхть (кепотьксонди, налхкшт, гаджетт, спортонь паршихть) или аф материальнайхть (лия ошу ардомась, содаф ломань мархта васедемась, мероприятияв молемась). Казнесь стане жа может арамс сюрпризкс — арьсеф сценарий, конань коряс «мялень пяшкодись» сонць кочксесы казнеть, нежедемок сянь лангс, мезе кельги «ёрамань арьсись».

2025-це кизоня эрь ломанти, кинь мялец, ули кода арамс «мялень пяшкодикс», кочкамок мяль-ёрама сайтса или валхтомок открытка кузнять лангста, кона путф кодамовок партнерскяй центраса. Акцияса ули кода няфтемс пря кода очнай, стане и дистанционнай форматса. Ломаньда башка, акцияса примсихть участия компаниятне, государственнай учреждениятне и общественнай организациятне.

Результаттне и масштабсь

2018-це кизоня «Мялень пяшкодемань кузня» акциять пингста ульсь пяшкотьф 450 мяль-ёрама. Кизоста кизос синь лувкссна касы:

• 2020: пяшкотьф 13,5 тёжяньда лама мяль-ёрама;
• 2021: пяшкотьф 38 тёжяньда лама мяль-ёрама;
• 2022—2023: пяшкотьф пцтай 47 тёжянь мяль-ёрама;
• 2023—2024: пяшкотьф 60 тёжянть малава мяль-ёрама.

2025-це кизоть пенцты кочкаф уликснень коряс, акциять улеманц пингстонза пяшкотьфоль сембоц 320 тежяньда лама мяльда 4 млрд цалковайда лама питне лангс. Акцияса примасть участия 120 тёжяньда лама мялень пяшкоди и 1,5 тёжянь партнерскяй организация. Акциясь лиссь народъётконь вастс: эсонза примсихть участия Испанияса, Италияса, Францияса, Кипраса и Сербияса эряй россияттне.

Партнёрхне

Акцияти инь васенце партнёркс ащи Росмолодёжсь. Акциять ширенц кирдьсазь паронь тиемань фонттне, общественнай и коммерческяй организациятне: кепотьксонди, «Унокт» фондть мархта марса тевонь якафтомать вельде пяшкотькшневихть эряфс мяльсна-арьсемасна эряфкшу ськамост эряй ломаттнень.

Од форматтне

2025-це кизоста сявомок нолдафтольхть акциять од форматонза:

• «Ила шра лангс» — «Русь» ярхцамбялень фондсь и X5 Group-сь ётафнихть марстонь акция, штоба лездомс ашу семьятненди ярхцамбяльса;
• «Казне мархта унокт» — «Унокт» фондть мархта марстонь тевонь тиемать келептемац эряфкшу ломаттненди лезксонь максоманкса.

Лятфтамат