Кондурушкин, Степан Семёнович
Степан Семенович Кондурушкин — писательсь, журналистсь, издательсь.
Эряфонь киц
Степан Семенович шачсь 5 январьста 1875-це кизоня сокаень-видиень лама шаба мархта ашу семьяса Мордовская Липовка велеса Студенецкяй волостень Самарскяй уездонь Самарскяй губерниянь (тяни — Липовка велесь Хворостянскяй районць Самарскяй областсь).
Преданиять коряс, Мордовская Липовка велесь эвондась XIX-це векста саф эрзянь ломаттнень тяза самаснон мархта. Алянц заботендаманц вельде Степан получась начальнай образования и 1894-це кизоня аделазе Вольскяй учительскяй семинариять. Лятфтаманзон эса С. Кондурушкин алянц колга сёрмадсь
«ума недюжинного и энергии несокрушимой»: «Он первый не только во всем селе, но и в целом округе решился, по совету учителя, отдать сына „в учение“»
Чувашскяй ичкоздень велеса кизода меле тонафтыкс покодемада меле, Степан Кондурушкин 1895 кизоня поступась Казанскяй учительскяй институту (ся пингоня — Средняй Поволжьяса сембода пряфкс педагогическяй центрась). Идькс пингонь, школань и студентонь и эряфста кой-кона шитнень сёрмадозень эсь колганза апак аделак повестьса (1918-це кизось).
Эряфонь кизонза Ближняй Востокса
1898-це кизоня, Кондурушкин Императорскяй Православнай Палестинскяй Обществать серьгядеманц коряс тусь Назарет ошу (Палестина), тоста сон ульсь кучф Рашайскяй округу общеобразовательнай дисциплинань тонафтыкс тонафнихнеди-христиаттненди. Меле Степан Семенович ульсь ётафтф Южно-сирийскяй учебнай округонь Дамаск ошу (Сирия) инспекторонь лездыень должностьс. Мзярда покодсь Ближняй Востокса, Кондурушкин тонафнезе арабонь кяльть, кочксесь тостонь эряйхнень эзда легендат и преданият, ламотне синь эздост меколи сувафтозень прозаса сёрматфонзон юрс.
Кондурушкинть-журналистть васенце выступлениянза лемтьфт эрявикс кизефксненди, конат сотфт ся пингонь Сирия масторть мархта («Сирийская газета», «Арабский язык и его преобразование», «О переселении сирийцев в Америку», «Меккская и Багдадская железные дороги»).
1900-це кизотнень ушетксста од писательть ладявихть творческяй сотксонза Н. К. Михайловскяень и В. Г. Короленконь мархта, Кондурушкинонь художественнай прозаса сёрматфонза ушедыхть лисендема «Русское Богатство», «Мир Божий» и лия журналса.
Россияв мрдамац
1903-це кизоня Кондурушкин кадсы службанц, штоба сяда тов мольфтемс тонафнеманц. Сон мрдай Россияв, кармай эряма Петербургса и поступай вольнослушателькс Санкт-Петербургсконь университету. Кафта кизот сон кармай тонафнема Восточнай факультетса арабско-персидско-турецко-татарсяй отделенияса, но меле полафтозе специальностенц и ётась юридическяй факультету.
1905-це кизоня Русско-японскяй войнать пингста Степан Кондурушкин ульсь терьтьф войнав и 1906-це кизоть кучказоза самс служась военнай чиновникокс — смотрителькс Сибирскяй военнай округонь полевой запасной госпитальса. Событиятне, конат савсть теенза няемс, ульсть сувафтфт «Забастовка» (1906) повестезонза, «Огарок» (1906) азкссонза. Мрдамок Петербургу, С. Кондурушкин кармай вятема политическяй тевтиемат, тяряфты сувамс Васенце Государственнай думаньруз.: Первая Государственная Дума кочкаматненди, конанди сон лемди «На выборах» кочкафса аф фкя очерк(1907).
Литертаурнай тевтиемац
1900-це кизотнень кучкаста Степан Семёнович Кондурушкин арай Петербургонь литературнай и общественнай эряфса сяда содафокс и няевикс. Сон малады «Знание» (Л. Н. Андреев, И. А. Бунин, А. И. Куприн, Е. Н. Чириков и лиятне) товариществаста писательхнень мархта, сяда тов мольфти ялгаксши и покодема («Русское богатство», «Мир Божий», «Сообщения Императорского Православного Палестинского общества», «Исторический вестник») российскияй журналхнень мархта, сувси Религиозно-философскяй обществать заседаниянзонды.
1908-це кизоня С. Кондурушкин пшкядсь А. М. Горькаенди аняльтькс мархта лихтемс сонь очерконзон и азксонзон «Знание» товариществать издательстваса. Тя эняльдемась арась творческяй корхнематненди ушетксокс Горькаень мархта, мезсь пяк лездсь Кондурушкинонь сёрмадыень тевса сяда товолдонь касомасонза. Тя ялгафнемаса инь оцюсь — «Знание» издательстваса С. С. Кундурушкинонь кочкаф сёрматфксонзон эвондамасна — «Сирийские рассказы» (1908), «Рассказы» (1910). Сборникненень лисемасна кемокстазь и кеподезь вяри Кондурушкинонь литературнай ширде, сёрматфонзон колга азсть мяль И. Ф. Анненский, М. О. Гершензон, А. Г. Горнфельд, А. И. Куприн, Е. А. Колтоновская.
1900-це к изотнень песта Кондурушкин кирди соткст «Речь» газетать мархта. Корреспондент лаца сон тиенди пингс коре ламос моли и кувака арнемат Сибирьге, Дальняй Востокова и Турцияить эзга. Вярьгок вастса сёрматфонзон эса «Речь» газетать лопанзон лангса, ащихть кизефксне — Самарскяй губернияса вачашить, рузонь сектантствать судьбасна и лиясь.
1909-це кизоня Кондурушкин тусь Од Модать руз.: (Новая Земля) эзга путешесияс, мезьда меле ульсть сёрматфт ки лангонь очерконза.
Васенце мировой войнать ушетксста С. Кондурушкин — «Речь» газетаса военнай корреспондент. Фронтста сёрматф очерконза кочеавсть «Вслед за войной» книгас. (1914—1915)".
Февральскяй революцияда меле С. С. Кондурушкин ашезь аще ширеса Петербургть общественно-политическяй эряфсонза («Половодье. Очерки первых дней переворота»). 1917-це кизоня сон ушеды нолнемонза «Земля» мокшекс «Мода» сонцень газетанц. Но ни 1918-це кизоня газетать азорондай советскяй властсь пякстасы, сяс мес пяк сидеста газетань лопатнень лангса сялневсть большевикнень тевтиемасна. Кондурушкинонди савсь тумс Петроградста Самарскяй губернияв, а меле (Якстерь Армиять шаштоманц сюнеда шинь стяма шири) — {[Омск]] ошу. Омскяйса писательcь сярятькстсь тифса и 1919-це кизонь 9-це [22-це] январьста кулось машинакинь станцияса. Калмаф Омскяень Казачьяй калмолангса[1].
Кочкаф сёрматфксонза
- «Сирийские рассказы» (1908)
- «Рассказы» (1910)
- «Вслед за войной. Очерки великой европейской войны» (1915)
- «В солнечную ночь» (1916)
- «Монах» (1917)
- «Половодье. Очерки первых дней переворота» (1917)
- "Толковый словарь: пособие при чтении газет (1917).
Лятфтамат
Литературась
Алёшкин А. В., Бирюкова О. И. Кондурушкин Степан Семенович // Вестник НИИ гуманитарных наук при Правительстве Республики Мордовия. — 2024. — № 1.
Маслова Е. Г., Лю Х. Возвращение Степана Кондурушкина:Монография о забытом писателе // Ежегодник финно-угорских исследований. — 2024. — № 1. — С. 121—124.
Раеф И. Э. Али-заде и С. С. Кондурушкин // Кросс-культурный оазис: актуальные тенденции развития арабской филологии в России. — 2020. — С. 21—30.
Антонов Ю. Г., Демин В. И. Лытыця сёрмацей: Степан Семенович Кондурушкин // Эрзянь литературась ды печатесь. — 2013. — С. 77—78.
Владимирова С.М. Проза С. С. Кондурушкина 1900—1910-х гг.: проблематика, поэтика, литературный контекст:диссертация на соискание ученой степени кандидата филологических наук. — Саранск: Изд-во Мордов. ун-та, 2023. — 209 с.
С. А. Дубровская, О. Е. Осовский, В. П. Киржаева, С. М. Владимирова. «Человек сирийский и серьезный…»: страницы жизни и творчества писателя Степана Кондурушкина: монография. — Саранск: Изд-во Мордов. ун-та, 2023. — 296 с.
Сочинения: Степан Аникин, Степан Кондурушкин, Аполлон Коринфский, Александр Завалишин: конец XIX-начало XX в. — Саранск: Мордов. кн. изд-во, 2006. — 527 с.
Чуваков В. Н. Кондурушкин Степан Семенович. — М.: Большая российская энциклопедия, 1994. — 50 с.