Заповедниконь международнай шись
| Международный день заповедников | |
|---|---|
 Абискунь национальнай парк . Заполярьяса шведскяй васенце национальнай парксь | |
| Ладяф | 2000 кизоня Перьфпялень ванфтома международнай союзть мяленц коряс |
| Ётафневи | эрь кизоня |
| Датась | 24-це майста |
| Сотф | 1909 кизоня Швецияса пуроптф национальнай парконь пуроптомать мархта |
Заповедниконь международнай ила руз.: (Междунаро́дный день запове́дников) — ила, кона ётафневи эрь кизоня 24 майста сембе масторлангса Перьфпялень ванфтома международнай союзть мяленц коряс. Профессиональнай илатнень эзда фкясь, кие ванфтсы заповедникнень.
Эрямопингоц
24 майста 1909 кизоня Швецияса ульсь пуроптф национальнай парк. Тя масторсь Европаса арась васенцекс, коса эвондась национальнай парконь и резерватонь система.
Заповедниконь международнай шись васьфневи 2000 кизоста эрь кизоня МСОП-ть мяленц коряс. Главнай цельсь — Перьфпяльть и рашкшань ванфтомась[1][2].
Россияса Заповедниконь и национальнай парконь шись васьфневи 11 январьста. Датась сотф странаса васенце Баргузинскяй заповедникть пуроптоманц мархта.
Илань койхне
Тя шиня паркнень и заповедникнень эса панчсвеихть-латцевихть тематическяй выставкат, ётафневихть экскурсият, лекцият перьфпяльть араламанц колга, фестивальхть и тага эрь месть.
Заповедникне
Заповедникне - тя модань коське или ведю вастт, коса аф мярьгондеви нолнемс тефт, конат тиендевихть ломанть вельде. Тя кардамась сотф флорать и фаунать , а тяфта жа ведьпраматнень, кунардонь мода варятнень и сери кефнень ванфтоманкса[3].
Масторлангса васенце заповедниксь ульсь пуроптф Шри-Ланкаса III-це векста минь эрадонк инголе. Эста Деванампиятиссонь царсь специальнай законца кардазень эсь подданнаензон сашендомс островть кой-кона вастонзонды, эсьтеенза и мельганза шачи раднянзонды ванфтоманкса[4].
Перьфпялень ванфтомань международнай союзть уликсонзон коряс 2024 кизоня масторлангса лувондовсь 6555 национальнай парк и 630-да лама перьфпяльдень биосфернай заповедник, конат ащихть 119 странава[5].
Масторлангонь сембода оцю заповедниксь ащи Африкаса. Сон пуроптф колма национальнай паркнень марс сотомаснон вельде — ЮАР-са Крюгеронь национальнай парксь, Мозамбикса Лимпопонь национальнай парксь и Зимбабвеса национальнай Гонарежу парксь. Марстонь площадец — 35 тёжянь кв. квайгяльбе[6]. Сембода ёмла заповедниксь, Галичья Горась ащи, Россияса. Сонь сатни марнек аньцек 2,3 км²[7].
Галереясь
Серенгети. Кельме ширдень Танзанияс национальнай парксь
Баргузинскяй заповедниксь. Россия (Бурятия)
Шри-Ланкань национальнай парксь
Вилпатту. Шри-Ланка. Масторлангса сембода сире заповедниксь
Лимпопонь транснациональнай парксь. Сембода оцюсь масторлангса.
Лятфтамат
- ↑ 24 мая отмечается Международный день заповедников. gorodirkutsk.ru. Город Иркутск.РУ (22 майста 2019). Дата обращения: 25 апрельста 2025.
- ↑ “Заповедный мир "Ненецкий"”. Русское географическое общество. 2023-05-24. Дата обращения 2025-04-25.
- ↑ “Что такое заповедник, и чем он отличается от заказника: примеры”. Моя планета. Дата обращения 2025-04-25.
- ↑ Национальные парки Шри-Ланки. travellanka.ru. Дата обращения: 25 апрельста 2025.
- ↑ Тамара Казарина. “Заповедные места”. ТАСС. Дата обращения 2025-04-25.
- ↑ “В Африке создан крупнейший национальный парк”. РИА Новости. 2002-12-11. Дата обращения 2025-04-25.
- ↑ “Международный день заповедников”. Парламентская газета. 2019-05-24. Дата обращения 2025-04-25.
|
Правообладателем данного материала является АНО "Интернет-энциклопедия «РУВИКИ». Использование данного материала на других сайтах возможно только с согласия АНО "Интернет-энциклопедия «РУВИКИ». |