Живоначальнай Троицань соборсь (Краснослободск)

Православный храм
Собор Троицы Живоначальной
Перестроенное здание собора
54°25′07″ с. ш. 43°47′38″ в. д.
Странась	Россия
Ош	Краснослободск, Советскяй площадсь, 6
Конфессиясь	Православия
Архитектурнай стильсь	Рузонь
Теварьсефксонь авторсь	Елецкий (реконструкция 1866)
Васенцеда лятфневи	1613 кизось
Строительствась	1778—1781 годы
Лоткафтома пингсь	1930-це
Приделхне	Казанскяй, Трёхсвятскяй
Статуссь	ОКН № 1300706000
Состоянияц	Одукс ладяф цехсь

Живоначальнай Троицань соборсь (руз. Собор Троицы Живоначальной) — Краснослободск ошть инь оцю храмоц, кона ашезь ванфтов. Ащесь Соборнай площадьса.

Соборть эрямопингоц

Соборонь васенце церькавсь ульсь шуфтонь. Мзярда сон путфоль кивок аф содасы, но улихть тяфтама арьсемат, што церькавсь строявсь ваксарошть (руз. крепость) мархта марса. Строямань пингсь, улема, XVII-це векть ушетксоц. Краеведсь священниксь И. Беляев няфти Фёдор Малоень «Писцовай книганц» лангс. Троицкяй соборть путомань пингонц коряс ули нинге фкя ингольдень валхнень кемокстайсна: «1613—1614-це кизотнень строяфоль Троицкяй церкавсь» — сёрматфкс типиконца, коса тяштьфоль: «иняруяфтфоль Троицкяй храмсь».

1655—1682-це кизотнень вакссозонза строяфоль Ильинскяй церькавсь. Сон ульсь соборть видеса лямбе церькавкс. 1763-це кизоня, Тамбовонь Духовнай консисториять указонц коряс тя приделсь явфтфоль соборть эзда «теенза максфоль башка приход». Сяльде, сяс мес ульсь кржа вастта, Ильинскяй церькавть лихтезь ваксарошста (сонь эздонза пингонь ётазь лиссь Благовещенскяй церькавсь). Ильинскяй церькавть вастс 1765-це кизоня соборть видес воеводать мярьгоманц коряс строяфоль шуфтонь од лямбе церькав Эрекшинь канды лихтибрять Шкаень Тядять лемса (руз. Божьей Матери Живоносного источника).

1778—1781-це кизотнень мийсь-рамайсь, заводонь азорсь Андрей Тарасович Миляков строясь эсь ярмаконзон лангс кевонь соборнай церькав, кона ащи 10 селень ваксса ингольдень церькавть эзда. Мзярда строявсь соборсь, шуфтонь церькафне шамсть и 1790-це кизоня синь калафтозь. Троицкяйть мизь Селищи вели, а Эрекшинь канды лихтибрянь церькавть мизь Троиц ошень калмолангс. Мзярда аделавсь соборть строямац «Краснослободскяень Спасскяй монастырть оцюнянцты Досифей иеромонахти мярькфоль иняруяфтомс соборть видеса кевста строяф кафта придел мархта церькавть». Тя храмть строямаса Миляков няфтезе эсь оцю кемаманц и эстетикаса шарьхкодеманц. Соборнай церькавть сон кадозе мялямгевкс эсь юмси-арси фамилиянцты (шачендсть аньцек стирнят).

Соборть аф весть стройсезь одукс. 1917-це кизонь оцю толда меле, мзярда палсь пцтай марнек ошсь, одукс тиезь церькавть куполонц, калафтозь ингольдень пайгонь кудть (руз. колокольня) и путсть од. 1829-це кизоня пякстазь кафта приделхнень, улема, мес алтарьса кржаль вастта, и тяфта оцюлгофтозь соборть. Тя полафтоматнень мельге соборсь 80 кизот ащесь тяфтак, апак петнек. Ошень эряйхнень мялезостоль церькавсь и шнакшнезь сонь: «Эрек ушетксонь Троицань церькавсь» (руз. церковь Живоначальной Троицы) пределонзон мархта тялькфтай приходонь лама ломань, аф кальдявста мазоптф".

1862—1866-це кизотнень соборсь одкстоптфоль, петьфоль рузонь стильса, карьхцне стясть 12183 цалковайс 75 трёшникс. 1875-це кизоня ташта пайгонь кудть калафнезь алдонь ярусть самс и строясть кафта од яруст, путсть частт, а 1881-це кизоня валфоль 500 пудонь таргай пайге.

XIX векть пенцты соборсь ульсь кувака (20 сель кувалмоц и 12 келец), кевонь, фкя этажень, сери поталак мархта зданиякс, кона строяфоль греконь крёс лаца, оцю ярхцама вастонь мархта и сери пойгонь куд мархта, кона ащесь шурьхкяпря лаца ащи купол ала. «Стенатне марнек марафт кирпицса, сотфт кшниса». Вельхксоц дуга мархта, кудбряц кафта ширдень, вельхтяф кшнинь листста. Кудбряса 5 прят, эрть эса шуфтонь жестьса чакаф крёз; пайгонь кудть пряса кшнинь зрняса валф крёс. Троицкяй соборда башка «кшнинь заводонь азорхне» Милякофне путсть ошса кевонь церькафт: Покровскяйть, Благовещенскяйть, Смоленскяйть и Владимирскяйть, а Краснослободскяень уездса — Ефаевань (1772 кизось), Аракчеевскяйть (1767 кизось). Троицкяй соборть ваксса ащесть Благовещенскяйсь и Смоленскяй церькафне. Тя архитектурнай мазы куттне мазопнезь ошть Прама и Мокша ляйхнень ширде.

1917-це кизонь революцияда меле ошень сембе церькафнень калафтозь коммунисттне. Троицкяй соборсь, кона сёлкфоль 1930-це кизотнень, ванфтовсь фкя этажень кудкс, коза 1950-це кизотнень ладязь кштирдемань-кодамань фабрикать цехонц. Кудть строязь одукс, лятф фрескатнень архтозь извёсткаса и краскаса.

Краснослободскяень лия церькафне

• Благовещенскяй церькавсь

Благовещенскяйть колга содаф аф лама. Сон строяфоль Ильинскяй церькавть вастс, кона путфоль 1655 и 1682 кизотнень ёткса. XVIII-це векть кучказонза Ильинскяй церькавсь ашель башка церькавкс. «Тя ульсь лямбе церькавкс [Троицкяй] соборть видеса, …сонь ашель башка пайгонь кудоц…». Сяльде сон сявфоль ваксарошсть потмоста и путфоль сонь стенанзон ваксс. Кирпицень церькав классицизмань стильса, кона строяфоль 1832-це кизоня Троицкяй соборть эзда кельме и шинь валгома шири. Фкя купол мархта храмть ульсь ярхцама вастоц и колма ярусонь пайгонь кудоц, конань вельхксса стяфтфоль шпиль. Ярхцама вастса Михаило-Архангельскяй и Ильинскяй приделхне.

Благовещенскяй церькавсь калафтфоль 1935-це кизоня. Сонь эздонза лядсь аньцек пайгонь кудсь, конань эзда тисть парашютнай вышка. И мзярда ирецта инструкторсь, комотемок прястонза, шавовсь, срафтозь и пайгонь кудтьке. Пингонь ётазь вастонц лангс строявсь «Восход» кинотеатрась. 2000-це кизотнень советскяй постройкать (кинотеатрать) сёлгозь, а кудсь пингонь ётазь таштомсь и каладсь.

Сон ащесь алдонь базаронь площадть кельме и шинь валгомань ширень ужесонза. Церькавсь путфоль Иоанн-Предтеченскяй алянь монастырть вастс, кона пякстафоль 1764-це кизоня, и кона ащесь Краснослободскяй ваксарошть руз. (крепость) кельме ширдень стенанц ваксса. Монастырьса ульсь кафта церькафт: Иоанн Предтечень иняру пророкть лемса и Шкаень Тядять лемса. Иоанн Предтечиень церькавсь ульсь шуфтонь, фкя престол мархта. Сонь строяманц колга содаф, што «сонь путомац ушедовсь фкя пингоня, мзярда ушедсь пуроптовома монастырсь…патриархть Адрианть кагодсонза кемокстаф и монастырть путомац, и сяка кагодса максф бславама церькавонь строяманди». Строяфоль сон 1699-це кизода аф сяда меле, а аделафоль стройкась 1701-це кизоня. Тя кемокстаф 1701-це кизонь 31-це январьста сёрматф указса, коса корхтафоль: «мярькф тейне, Иосиф архимандритти, иняруяфтомс Предтечень монастырть церькавонц и эста иняруяфтыне сонь». Омбоце церькавсь — Шкаень Тядять — ушетфоль 1709-це кизоня. Сонь колганза улихть тяфтама сёрматфт: «нинге 1709-це кизонь 18-це шиста Великай Оцязорть указонц коряс максфоль бславама Рязанень и Муромонь Митрополитть Инярудонга Иняру Стефонть эзда… путомс церькав Шкаень Тядять лемса». Тя шуфтонь кафта церькафне валом-валом таштолготкшнесть.

Мзярда монастырсь нолдафоль, церькавсь арась приходкс. Мишендись-рамсись Миляков Андрей Тарасович макссь ярмак и 1772-це кизоня ташта церькавть вастс путфоль кевонь од храм, кона васенце кизотнень лемневсь Иоанн Кстиндайть лемса. 1777-це кизоста сявомок теенза максови омбоце лемсь — Смоленскяй. Тя лемсь максфоль Шкаень тядять Смоленскяй шкайликонянц лемса. Кевонь кельме храмсь лемтьфоль Шкаень Тядяти. Сонь лемозонза престолть тиезь инь оцюкс, а Иоанна-Предтеченнеть — омбоцекс, приделса. Церькавсь кагод коряс лемневсь Смоленскяйкс, а ломаттне сонь лемнезь Предтеченскяйкс. Кирпицень церькавсь 1772-це кизонь зданиять юрозонза, конань строязе мишендись-рамсись А. Т. Миляков, строяфоль одукс 1849-це кизоня. Фкя купол мархта храмсь, конань пряса шурьхкя пря лаца купол, ярхцама васта и пайгонь куд мархта, конатнень пряса стане жа шурьхкя пря лаца купол. 1893-це кизоня церькавть перьф путфоль кевонь перяфкс кшнинь решётка мархта. Ярхцама вастса Иоанн Предтечень приделоц, Лука Евангелистонь и вмч. Варварань. Срафтфоль-калафтфоль XX-це сяда кизотнень кучкаста.

Кирпицень церькав, кона строяфоль XIX—XX-це векнень ёткса 1770-це кизонь кевонь кудть вастс. Фкя купол мархта храм, планца виде ужа мархта, сонь видесонза колма ярус мархта пайгонь куд. Ярхцама вастса ульсть приделхт Покравонь и Алексиень Шкаень ломанть лемса. Инколи сон ащесь Покравонь авань монастырьса (монастырсь ащесь Краснослободскяень ваксарошть шивалгомань ширень стенанзон ваксса, коса тяни Севастьяновонь кудонза-пирьфонза) и ульсь, кода и монастырть сембе кудонза, шуфтонь. Строямань пингонц ули кода содамс сёрматфть коряс, кона тифоль приходской Покравонь церькавть типиконзонза: «пуроптомань кизоц сёрматфса 1672-цесь, а церькавть иняруяфтома кизоц — 1675-цесь». Церькавсь ульсь кафта престолонь — Шкаень Тядянь Покравонь и Николай Чудотворецонь. Монастырть нолдамдонза меле 1764-це кизоня церькавсь арась приходскойкс и теенза «ульсь сёрматф Ильинскяй церькавть эзда 69 десятинат и Николаевскяйть эзда 9 десятинат». Таштомдонза меле сон ётафтфоль лия вастс (тоза, коса тяни ащи РОВД-сь) и мишендить-рамайть Миляковонь ярмаконзон лангс одукс строявсь кевста.

• Владимирскяй церькавсь

Владимирскяй церькавсь ащесь ошень Владимирскяй (Карьгинскяй) площадьса. 1680-це кизоня тя вастса путфоль омбоце приходской церькавсь Николай Чудотворецень лемса. Церькавонь путомс ярмакне кочкафтольхть тяфта: «пушкарьхне и сокайхне-видихнемВаська Гусев и Сидорка Григорьев эняльдьсть мярьгомс строямс церькав». Пингонь ётазь шуфтонь церькавсь таштомсь и 1762-це кизоня промышленникне Милякофне шуфтонь кафта церькафнень вастс Николаевскяйть и Владимирскяйть, кона ульсь Карьгаса, строясть кевонь фкя церькав Владимирскяй Шкаень Тядять лемса, конань ульсь приделоц Николай Чудотворецень лемса. Кирпицень церькавть келептезь XIX-це векть васенце пяльксстонза, ульсть приделхт Никольскяй и Всехсвятскяй. Калафтф XX-це векть кучкастонза, тяни ся вастса ащихть автовокзалсь и ГИБДД-сь. Кодамоль ланга тя церькавсь аф содаф, ванфтовсь аньцек фкя фотография, коса ичкозде няеви тя церькавть куполоц, но сонць кяшфоль куттнень мархта.

• Успенскяй церькавсь (ванк Краснослободскяень Успенскяй авань монастырть)

Строяфоль рамсить-пишендить меценатть А. Д. Муромцевонь ярмаконзон лангс 1810 − 1816-це кизотнень. Успенскяй церькавсь ульсь приходскойкс 1861-це кизоти самс (кагод коряс Успенскяй авань монастырть панжема кизоц).

• Петропавловскяй церькавсь

Карафть ваксса, Малая Саранская ульцять песа, ащесь калмолангонь Петропавловскяй ёмла церькавнясь. Сонь колганза содаф прокс кржа, сонь тевоц сотфоль ризфса, сяс лама коса сон лемневи кода «калмолангонь» и лятфневи, мзярда 1817-це кизоня лиссь оцю пожар, мзярда «Соборнай, Покровскяй, Благовещенскяй и Смоленскяй церькафне мянцть толда, но калмолангонь шуфтонь церькавнясь палсь педа-пес …». Пожарда меле мишендить-рамсить А. Д. Муромцевонь ярмаконзон лангс сон кантфоль сай пингонь Успенскяй монастырти. Улема, архитектурань пяльде сон ульсь аф шта ни кодама и сяс сяда мельдень каготтнень эса аф лятфневи. XX-це векть ушетксста калмолангса кельме ширде Успенскяй монастырть ваксса строяфоль рузонь стильса фкя пря мархта кирпицень церькав. Калафтфоль XX-це векть кучкастонза.

• Скорбященскяй церькавсь (Сембе пичедихнень кенердемасна Шкаень Тядянь шкайликонянь церькавсь)

(руз. Церковь иконы Божией матери Всех скорбящих радость)

Кудонь храм ошень тюрьмань замкаса, кона ащесь ляйть трваса. Фкя пря мархта четверик, лямбе и шинь стямань ширде петфтафоль пякстамгудонь корпусти. Тя кудсь строяфоль императорть Николай I-цеть мярьгоманц коряс XIX-це векть 30-це кизотнень. Кармай эльбятьксокс арьсемс, бта императорсь шарфтсь башка мяль уездонь ошти, сяс мес тя пингть сембе уездонь ошнень эса, коса улихть пякстамгудонь замкат, стройсевсть тяфтама церькафт. Калафтфоль XX-це векть кучкаста.

1917-це кизонь революцияда меле

Ревлюцияда меле ламошка куттне срафтфтольхть-калафтфтольхть. Церькафнень тевсна кальдяфтольхть: синь марнек юмафтфольхть-арафтфольхть. Ся васттнень эса, коса синь ащесть, аш кодамовок лятфнембяль синь колгаст. Тяда башка, ся пингонь ломаттнень мяльсноль аф аньцек калафтомс церькафнень, но и нардамс мялямть синь колгаст. Кодамовок оцю исследования тя аймаконь монастырьхнень и церькафнень колга ся пингть ашезь сёрматкшнев В. Б. Смирновать и Т. Н. Протасьевать работаснон башка. Косот архивонь ся каготтне, конатнень лангс няфнесть эсь работасост тяфтама содаф краеветтне, кода И. Беляев, Г. Петерсон, Н. Соколов, И. Голубинский, Шарьхкотьф, синь ашет ни. Синь эздост кой-конатнень юмафтозь-арафтозь.

Лятфтамат

Литературась

• Соколов Н. М. Историко — статистическое описание Краснослободского Троицкого собора (1624—1894 г. г.) // Пензенские Епархиальные ведомости. — 1894. — № 17. — С. 788.
• Беляев И. Эпизоды из истории города Краснослободска и его уезда в XVIII столетии // Пензенские Епархиальные ведомости. — 1868.
• Лютов А. В. Церкви и монастыри Краснослободска // Красная Слобода. — 1993. — № 46,47,48,49.

Ссылкатне

• Собор Троицы Живоначальной в Краснослободске (рус.). Храмы России. Дата обращения: 22 августста 2025.