Гагарин, Юрий Алексеевич

Юрий Алексеевич Гагарин
руз.: Юрий Алексеевич Гагарин
Масторсь	СССР
Специальностсь	Военнай лётчик Лётчик-космонавт
Воинскяй званиясь	ВВС СССР, полковник
Экспедициятне	«Восток-1» (12-це апрельста 1961) 1-це ломанць космосса
Космосса пингсь	1 част 48 минута
Шачема пингсь	9-це мартста 1934-це кизоня(1934-03-09)[…]
Шачема вастсь	Клушино велесь (Смоленскяй областсь), Гжатскяй районць, Западнай областсь (1929—1937), РСФСР, СССР
Кулома пингсь	27-це мартста 1968-це кизоня(1968-03-27)[…] (34 кизоц)
Кулома вастсь	Новосёлово велеть ваксса, Владимирскяй область, РСФСР, СССР
Автографсь
Казнетне
Серьгядемань лемсь	«Кедр»
Юрий Алексеевич Гагарин

Ю́рий Алексе́евич Гага́рин шачсь (эйзюрговть 9-це шистонза 1934 кизоня, Клушино, Гжатскяй (тяни Гагаринский) районца, Западнай областьса (тяни — Смоленскяй областсь), РСФСР, СССР — эйзюрговть 27-шистонза 1968, Новосёлово велеть маласа, Киржачскяй районца, Владимирскяй областьса, РСФСР, СССР) — васенце ломанць, кона лийсь васенцеда космосу. СССР-нь лётчик-космонавт, Советскяй Союзонь Герой, лама государстваса отличиянь высшай знаконь кавалер, Россиянь и омба масторонь ошень почётнай гражданин.

СССР-нь ВВС полковник (1963), 1-це классонь военнай лётчик, СССР-нь спортонь заслуженный мастер(1961), ЦК ВЛКСМ член, СССР Верховнай Советонь 7-це и 8-це пуроптомань депутат.

Шудиговть 12-це шистонза 1961 кизоня Юрий Гагарин арась мировой историяса васенце ломанькс, кона лийсь космосу.

«Восток» ракета-носительсь «Восток-1» корабльть мархта, конань бортсонзоль Гагарин, ульсь нолдаф Байконур космодромста. Тя космодромсь ульсь Кызылординскяй областьса Казахскяй ССР-са. 108 минутада лиемда меле Гагарин парста валгсь Саратовскяй областти, аф ичкози Энгельс ошть эзда. Шудиговть 12-це шись 1961 кизось, Юрий Гагаринонь космосу лиемань шиц, ульсь азф праздникокс-илакс — Космонавтикань шикс.

Эряфонь киц

Идькспингоц и тонафнемац

Юрий Алексе́евич Гага́рин шачсь эйзюрговть 9-це шистонза 1934 кизоня, Клушино велеса, Гжатскяй (тяни Гагаринский) районца, Западнай областьса (тяни — Смоленскяй областсь).

Ю.Гагаринонь лемса Кудсь-музейсь

Фактс коре шачема вастоц — шачфтома кудса Гжатск ошса. 1968 кизоня тя ошти макссть Гагарин лем. Шачсь покодиень семьяса: аляц, Алексей Иванович Гагарин (эйзюрговть 14-це (27-це) шистонза 1902[8] — марьговть 30-це шистонза 1973[9]), — плотник, тядяц, Анна Тимофеевна Матвеева (ацамговть 20-це шистонза 1903 — лямбековть 12-це шистонза 1984), лофцонь-товарнай фермаса покодись"… аляц плотниколь, а тядяц — траксонь потяель. Цебярь покодеманц инкса сонь путозь колхозонь лофцонь-товарнай фермав оцюнякс" — Гагарин, 1961</ref>, казьф Якстерь тяштень и Народонь ялгаксшинь орденца[мяльполаткс 1]. Атяц, Тимофей Матвеевич Матвеев (1871—1918), Путиловскяй заводса покодись, эрясь Санкт-Петербургса, Автовоса, Богомоловскяй (тяни Возрождениянь) куроса XIX векть песта. Гагариттнень семьяса ульсь колма цёрат и стирь. Юрий ульсь колмоцесь оцюфнень ёткста.

Панжиговть 24-це шистонза 1945 кизоня Гагариттнень семьясна ётась эряма Гжатск ошу. Панжиговста 1949 кизоня Юра аделазе Гжатскяй средняй школань котоце классть. Тяка кизоня иможговста сась тонафнема Люберецкяй ремесленнай 10 № училищав, коса сон сидеста якась художественнай самодеятельности — морась духовой оркестраса трубаса.

Тяка ёткть Юра кармась тонафнема рабочай од ломанень илядень школаса. Тонафнемать пингста, ацамговть 16-це шистонза 1949 кизоня, сувась комсомолу. Илядень школаса сисемце классть аделазе панжиговста 1951 кизоня, а лямбеговста аделазе ветес училищать формовщик-литейщик специальностьс коре. Марьговста 1951 кизоня Гагарин сай тонафнема Саратовскяй индустриальнай техникуму литейнай отделенияв, коса тонафнемада башка няфтезе прянц цебярь физкультурникокс и «Трудовые резервы» ДСО секретарькс. Тюжяковть 25-це шистонза 1954 кизоня васенцеда сась СССР-нь ДОСААФ-нь аероклубу. 1955 кизоня Юрий Гагарин сатсь оцю сатфкст, ветес аделазе тонафнеманц и тиезе спортивнай аэродромса Дубкиса васенце эсь лиеманц Як-18 самолётса. Аэроклубса Юрий Гагарин тись 196 лиема и лиендсь 42 част 23 минута.

Тюжяговть 7-це шистонза 1955 кизоня Гагарин ульсь сярьгятьф Советскяй армияв и кучф Оренбург ошу (ся пингста — Чкалов ошу) К. Е. Ворошиловонь лемса лётчиконь военнай авиационнай 1-це училищав. Юра тонафнесь эста Я. Ш. Акбулатов лётчикть-инструкторть вятеманц ала. Тюжяговть 25-це шистонза 1957 кизоня Гагарин аделазе училищать ветес. Кафта кизот служась Луостариса (Мурманскяй областьса) истребительнай авиационнай 769-це полкса ВВС Севернай флотонь истребительнай авиационнай 122-це дивизияса.

МиГ-15бис вооружённай самолётса тюжяковти 1959 кизоти самс лиендсь марнек 265 част. Ульсь «3-це классонь военнай лётчиконь» квалификацияц. Воинскяй званияц — старшай лейтенант.

Космическяй отрядса

КПСС-нь ЦК-ть и СССР-нь Министрань Советть решениянц коре № 22-10 1959 кизонь якшамговть 5-це шистонза сявомок и СССР-нь Министрань Советть постановлениянц коре № 569—264 1959 кизонь панжиговть 22-це шистонза ульсь примаф решения космонавтонь отряду кочкамать колга и синь анокламаснон «Восток-1» корабльса васенце лиемати. Сай пингонь космонавттнень кочкамаснон и анокламаснон коряс тевть вятезь СССР-нь Военно-воздушнай вийхне. Мярьгондевсь кочкамс планц коре 20 кандидатат. Ацамговть 9-це шистонза 1959 кизоня Гагарин сёрмадсь рапорт, коса анась лезкс, штоба сонь сёрмадолезь космонавтонь группати кандидататтнень ёткс.

Неделя ётазь Гагаринонь тердезь Моску ошу, штоба сон ёталь медицинскяй сембе ширде обследования Центральнай научно-исследовательскяй авиационнай госпитальса. 1960 кизоть ушетксста ульсь нинге фкя специальнай медкомиссия, кона лувозе старшай лейтенантть Гагаринонь космосу лиеманди ладяйкс-кондястикс.

Якшамговть 11-це шистонза 1960 кизоня ВВС Главнокомандующайть К. А. Вершининонь приказонц коре ульсь тиф специальнай войсковой часть (в/ч) № 26266, конань задачанза ульсть космонавттнень анокламасна (сяда тов, частьсь ульсь тиф-полафтф ВВС космонавтонь анокламань Центракс). Гагарин ульсь сёрматф ВВС Главнокомандующайть К. А. Вершининонь приказонц коре эйзюрговть 3-це шистонза 1960 кизоня кандидатонь группати космонавтокс. А эйзюрговть 11-це шистонза сон ардсь семьянц мархта военнай службань од васту. Эйзюрговть 25-це шиста сявомок ушедсть космонавтонь анокламань программать коряс занятиятне.

Космонавтть кочкамац космосу васенце лиемати

Ю. А. Гагаринда башка, космосу васенце лиемати ульсь пуроптф нинге лама ломань; сембоц эздост комсь ломанель (СССР-нь космонавтонь васенце отрядсь). Кандидаттне кочксевть, Королёвонь мярьгоманц коряс, военнай лётчикнень-истребительхнень эзда. Ся пингть лувондовсь, што тяфтама лётчикнень оцю опытсна сталмонь ётафтомань, стрессовай ситуациянь и давлениянь полафтомань коряс. Космонавтонь васенце отряду кочкамась ётафневсь медицинскяй, психологическяй и лама лия параметрань лангс ванозь. Кандидатсь кизос коре улель аф сяда лама 25-30 кизода, серес коре аф сяда оцю 170 см, сталмос коре аф сяда лама 70-72 кг . Сембе ширде улель вии, кеме и таза.

Юрий Гагаринонь серец, официальнай служебнай характеристиканц лангс ванозь, ульсь 165 см, лия даннайхнень коряс, сувафтомок «ЕКА» — ульсь 157 см. Серес и сталмос коре вешфксне эвондакшнесть «Восток» космический корабльти ладяф кирьфтаматнень эзда, конат ванондовсть «Восток» ракета-носительть мощностенц мархта. Тяда башка, кандидаттнень ваномста сявондевсь мяльс и положительнай характеристикась, партияса улемась (Гагарин арась КПСС-нь кандидатонь членкс 1959 кизоня, а сувась партияв 1960 кизоня псиговста), политическяй активностсь, социальнай происхождениясь.

Шудиговть 8-це шистонза 1961 кизоня ётафтовсь Государственнай комиссиять пякстаф заседанияц космическяй корабльть нолдаманц коре. Заседаниять вятезе К. Н. Руднев, СССР-нь Министрань Советть Государственнай комитетть обороннай техникань коре комиссиянь оцюнясь. Комиссиясь кемокстазе историяса космосу лиемс ломанти васенце заданиять, конань сёрмадозь С. П. Королёв и Н. П. Каманин. Заданиять коряс эрявсь тиемс Модать перьф 180—230 сереса, 1 част 30 минутань пингс коре фкя шаркс и валгомс азф району. Лиемать целец — проверямс ломанть космосса улеманц тяконь лаца тиф корабльса, провярямс корабльть оборудованиянц лиемста, проверямс корабльть Модать мархта сотксонц, ваномс корабльть и ломанть космосста валгомань надёжнай средстватнень. Заседаниять панжада пялькста меле комиссиясь илядсь ёмла составса и кемокстазе Каминонь мярьгоманц, нолдамс космосу лиема Юрий Гагаринонь, а Герман Титовонь кемокстамс кода космосу лиема аноклаф космонавт.

Ю. Гагарин космосу лиемань стартта инголе

Юрий Алексеевич Гагаринонь мархта «Восток» корабльть стартоц ульсь нолдаф шудиговть 12-це шистонза 1961 кизоня 09:07 москувонь пингс коре (06:07 UTC) Байконур космодромста.

Полигононь дежурнайть журналу сёрматфоц

Полигононь дежурнайть журналу сёрматфоц

«Восток» ракета-носительсь покодсь замечанияфтома, но мекольдень этапса радиоуправлениянь системась, кона должен лоткафтомс 3-це ступенень двигательть, ашезь карма покодема. Двигательть лоткафтомац ульсь аньцек дублирующай механизмать (таймерть) покодемада меле. Но корабльсь ни куцсь орбитав, инь оцю точкац конань (апогей) кармась 100 вайгяльбеде вяре лувфть коряс. Тяфта орбитаста «аэродинамическяй торможениянь» лезкс вельде валгомась заняль лама оценкань коре 20 шиста сявомок 50 шити молемс.

Ю. Гагарин корабльса

Гагарин Ю. орбитаса азонкшнесь эсь прянь маряманц, корабльть состояниянц и наблюдениянзон колга. Сон иллюминаторса ванондозе Модать сембе ширде, сонь коволонзон, пандонзон, вирензон, ляензон, няезе менельть и Шить, няезень лиемста лия тяшттнень Модать цильфса. Тиемок Модать перьф фкя шаркс, 10:53 106-й минутаста корабльсь аделазе лиеманц. Торможениянь системать тапаманц-коламанц сюнеда Гагаринонь мархта валкфтови аппаратсь валгсь аф планц коре Сталинградть эзда 110 вайгяльбе васту, а Саратовскяй области, аф ичкози Энгельс ошть эзда Смеловка и Подгорное велетнень малас. 10:48 частса маластонь зенитно-ракетнай дивизиононь радарсь кундась-няйсь аф содави цель — тя ульсь валкфтови аппаратсь (зенитчикненди суткада тяда инголи мярьгсть, штоба синь ванольхть «менельста контейнерхнень» мельге).

Васенце ломаттне, конат васьфтезь космонавтть лиемада меле, ульсть тястоконь вирь ваныть рьвац Анна (Анихайят) Тахтаровась и сонь кота кизоняса Рита уноконяц. Курокста валгомань васту састь дивизионцта военнайхне и тястоконь колхозникне. Военнайнь фкя группась сявозе араламс валкфтови аппаратть, а омбоцесь арфтозе-пачфтозе Гагаринонь частти. Тоста Гагарин телефонца азондозе ПВО дивизиянь командирти: "Эняльдян пачфтемс ВВС-нь оцюняти: задачать пяшкодине, валгонь ладяф районца, прязень маряса цебярьста, мезезевок апак синнек. Гагарин.

#	Стартовай корабльсь	Старт, UTC	Экспедициясь	Корабльсь валгоматне	Валгомась, UTC	Лиемась	Лисематне панжада космосу	Пингсь панжада космосса
1	Восток-1	12.04.1961, 06:07	Восток-1	Восток-1	12.04.1961, 07:55	00 сутка 01 част 48 минута	0	0

Советскяй СМИ-нь кулятне

Секретонь ванфтомать коряс космосу васенце ломанть нолдамац инголькиге ашезь азонткшнев. Пяк содаф кадратне, коса можна няемс и содамс Ю. Гагаринонь, тифтольхть аф ся шиня, мзярда ульсь космосу нолдамась, а сяда меле, специальна кинохрониканди, коса сон нинге весть тиезе семботь, мезе тись космосу афкуксонь тумста.

Шудиговть 12-це шистонза 1961 кизоня Ю. Б. Левитан дикторсь радиваса пачфтезе ТАСС-нь кулять, коса корхтавсь Юрий Гагаринонь «Восток» космическяй корабльса космосу лиеманц колгаː «Шудиговть 12-це шистонза 1961 кизоня Советскяй Союзса лихтьф орбитав Модать перьф мирса васенце „Восток“ космическяй корабльсь-спутниксь, конань бортсонза ульсь ломань. „Восток“ космическяй корабльса-спутникса пилоткс-космонавтокс ульсь СССР-нь лётчиксь майорсь Гагарин Юрий Алексеевич».

Космосста лиемада меле

Москуса васедемась

Васенда кивок ашезь арьсе тиемс оцюдонга оцю васьфтема Москуса Гагаринонь мархта. Семботь арьсезе мекольце пингть Никита Сергеевич Хрущёв. Сонь цёранц, Сергей Хрущёвонь валонзон коряс, алязе ушедсь тоста, што гайфтсь оборонань министрати Малиновскяй маршалти и мярьгсь: «Гагарин званиясь коре старшай лейтенант. Эряви сяда курокста касфтомс званиянц. Малиновскяй аф мяль вельде мярьгсь, мезе максы Гагаринонди капитанонь званиясь. Никита Сергеевич, кулемок тяфтама валхнень, пяк кяжиясь и азозе: „Кодама капитан? Тинь хоть теенза майоронь звание максода“. Малиновскяй ламос ашезь согласиндакшне, но Хрущёв ашезь аерда эсь мяленц и валонзон эзда, и тяка шиня Гагарин арась майоркс». Меле Хрущёв гайфтсь Кремляв и вешсь, штоба Гагаринонди аноклальхть цебярь васьфтема. Лия ванфкснень коряс, Гагаринонди капитанонь званиять ёрасть максомс шудиговста 1961 кизоня, но Д. Устинов ёразе максомс Гагаринонди эстокиге майоронь званиять. Очередьфтома тя званиясь приказсь коре максомаль стартта инголе, но Юрий Гагарин содазе майоронь эсь званиянц колга аньцек тумда меле. ТАСС-онь сембе кулятнень эса шудиговть 12-це шистонза азондовсь «Юрий Гагаринонь майорть колга».

Шудиговть 14-це шистонза Гагаринонь инкса лийсь Ил-18, а Моску ошть малас лиемста самолётти маладсь почётнай авиационнай эскортсь, конаса ульсь МиГ-17 сисем истребительхть. Эскорт мархта самолёттне торжественнай стройса лийсть Москуть кучканц вельф, Якстерь площадть вельф, меле валгсть Внуково аэропорту. Тоса Гагаринонь учезе оцюдонга оцю васьфтема: кеняртьф ломаттне, журналисттне и операторхне, странань оцюнятне. Самолётсь ардсь аэропортонь центральнай зданияти, валхтозь трапть, и васенцекс эзганза валгсь Гагарин. Самолётть эзда правительственнай трибунатненди молемс ладяфоль пяк якстерь ковёрня, ланганза и мольсь Юрий Гагарин. Гагаринонь молембачк юксевсь ботинкастонза сотксоц (лия версияс коре — юкссевсь цюлкань кирдемац), но сон ашезь лотка и пачкодсь правительственнай трибунати, рисковандась пупордамс и прамс. Маладомок трибунати, Юрий Гагарин макссь рапорт Никита Хрущёвонди: Советскяй Союзонь Центральнай Комитетонь Коммунистическяй партиянь Васенце секретарь ялгась, СССР-нь Министрань Советть Председателец! Кенярдезь теенть азондса, што Центральнай Комитетонь Коммунистическяй партиять и Советскяй правительствать заданияц тиф-пяшкотьф…

Меле ульсь ардома панжада «ЗИЛ-111В-са», Гагарин пеедсь васьфтихненди. Сембе вастова марявсть поздравленият, ламотне яфиесть плакатса. Фкя ломанць лиссь ломаттнень ёткста и казсь Гагаринонди панчф пусма. Якстерь площадьса ётась митинг, коса Никита Хрущёв азозе Гагаринонди «Советскяй Союзонь Геройнь и СССР лётчик-космонавтонь» званиять максоманц колга.

Митингсь шарсь 3-частонь демонстрацияс, конань эса шумбракснесть Юрий Гагарин и советскяй государствань оцюнятне Ленинонь мавзолеенц трибунаста. Демонстрациять аделамда меле Никита Хрущёв прважазе Гагаринонь мавзолейть потмос, саркофагу. Торжествась мольсь Кремляса васедемста, коса ульсть конструкторхнень эзда ламотне, лемсна конатнень ся пингста официальнайста ашесть азонкшнев. Леонид Брежнев максозе Гагаринонди «Зрнянь Тяште» Советскяй Союзонь Геройть и Ленинонь орденонц. Ся пингть од шачи цёранятнень тядятне-алятне лемнезь Юракс, Гагаринонь честьс.

Омбоце шиня ётась пресс-конференция, конаса Гагаринонди и конструкторхненди макссесть кизефкст омба масторонь журналисттне. Конференциясь ушедсь кизефксста Гагаринонди сянь колга, аф сави ли сон раднякс Гагарин княсненди, конат тяни эряйхть США-са. Тянь коряс Гагарин мярьгсь: «Радня ломаненень ёткса кодамовок княсть и козя ломатть аф содан и мзярдонга синь колгаст ашень куленде».

Омба мастору якаматне

Омба мастору Юрий Гагарин васенцеда лийсь Чехословакияв. Сон лийсь Прагав обычнай рейсовай Ту-104 самолётса. Гагарин тяфта жа ульсь Болгарияса, Финляндияса, Великобританияса, Польшаса, Кубаса, Бразилияса, ков валгондсь Кюрасао островс, Канадаса, Исландияв лоткама васта мархта, Венгрияса, Индияса, Цейлонца (тяни Шри-Ланкась), Афганистанца. 1962 кизоня Гагарин ульсь Объединённай Арабскяй Республикаса (Египетса).

Омба мастору якаматне

Иможговста 1963 кизоня Гагарин улендсь Парижса, коса примась участия астронавтикань международнай XIV конгресса. Тюжяковста 1963 кизоня В.Терешковать мархта марса улендсь Нью-Йоркса ООН штаб-квартираса.

Сембоц Юрий Гагарин лия мастору ардомас коре улендсь пцтай 30 странаса.

Сяда товолдонь эряфоц

Гагарин Ю. космосста самдонза меле якась эрь кодама мероприятияс. Сидеста васетькшнесь лия космонавттнень мархта.

Ю. Гагарин лия космонавттнень мархта

Иможговть 3-це шистонза Юрий Гагарин сась тонафнема Жуковскяйнь лемса Военно-воздушнай инженернай академияв, а даволговть 17-це шистонза 1968 кизоня С. М. Белоцерковскяйнь кядяла аралазе дипломнай проектонц методологиянь тевс нолдамань и дозвуковой аэродинамикаса, кона тиф-ладяф космонавтонь-кулхцондыень группать вельде воздушно-космическяй лиендемань фкя вастонь аппаратонь коряс.

Государственнай экзаменационнай комиссиясь макссь Юрий Гагарин полковникти «лётчик-инженер-космонавт» квалификация и рекомендацият академииянь адъюнктурав.

1964 кизоня Гагарин арась космонавтонь анокламань Центраса оцюнянь полафтыкс и путф советскяй космонавтонь отрядонь командиркс. Гагарин ульсь кочкаф СССР Верховнай Советонь 6-це пуроптомань депутатокс (кочкаф Союзонь Совету 1962 кизоня Сычёвскяй округса) и 7-це (1966 кизоня национальностсь коре Совету) пуроптомань, ульсь ЦК ВЛКСМ сувайкс (кочкавсь ВЛКСМ XXIV и XXV съезду) и вятезе космонавтикань внештатнай отделть «Якстерь Тяште» («Красная Звезда») газетать (1964 кизоста сявомок). Тяда башка, космосу лиемац тиезе сонь содавиксокс лия масторхнень эсовок. Гагарин ульсь президентокс советско-кубинскяй ялгаксшинь Обществаса, «Финляндия — СССР» Обществаса почётнай членкс и арнесь лама странава миронь и ялгаксшинь ванфты миссия мархта.

Ю. А. Гагаринонь шавовомац и Кремлёвскяй стенаса калмолангонь седяфоц

Ю. А. Гагаринонь Кремлёвскяй стенаса калмолангонь седяфоц

1968 кизонь эйзюрговонь 27-це шистонза Гагарин шавовсь авиационнай катастрофаса, тиемок тренировочнай лиема МиГ-15УТИ самолётса опытнай инструкторть В. С. Серёгинонь кядяла, Владимирскяй областень Киржачскяй райононь Новосёлово велеть маласа. Гагаринонь и Серёгинонь ловажасна ульсть плхтафт. Гагаринонь и Серёгинонь мархта пращамась ётась 1968 кизонь эйзюрговонь 30-це шистонза. Советскяй Армиянь Центральнай Кудса ульсть путфт плхтаф ловажаснон мархта кядьгот. Якстерь площадьса ётафтфоль ризнамань пуромкс. Масторсонк азфоль сетьмошинь минута. Гагаринонь и Серёгинонь ловажаснон мархта кядьгосна ульсть путфт-калмафт Кремлёвскяй стенаса воинскяй почесть мархта.

Почётнай званиянза и казненза

Ю. А. Гагаринононь ульсь лама почетнай званиядонза и казнедонза. Теенза максфоль пяк лама казне, кода эсь масторонь, станя и лия масторонь. Теенза максфольхть Советскяй Союзонь Героень, Советскяй Союзонь Социалистическяй Трудонь лепне. Тяфта жа теенза максфтольхть омба масторонь эрь кодама лепт.

Почётнай гражданствась

Ю. Гагарин лия масторонь ломаттнень мархта

Зрнянь панжемась казненди

Юрий Гагаринонь пяк кельгозь марнек масторлангонь ломаттне. Сон кочкафоль лама омба масторса почётнай гражданинкс. Омба масторса теенза максфольть зрнянь панжемат Каир и Александрия ошнень эзда(Египет).

Ю. А. Гагаринонь лемоц масторлангса

Ю. А. Гагаринонди лемтьфт масторлангса ошт, курот, аэродропт. Сон лемоц максф ваймамань и кульурань куттненди. Васенце космонавтть лемса панчфт школат, тифт и стяфтфт памятникт, панчфт музейхть, нолдафт ярмакт, значокт, почтовай маркат.

• 

  Космонавтикань шити почтовай маркась

• 

  Ю. Гагаринонь лемса нолдафт ярмакт

• 

  Ю. Гагаринонь лемса нолдафт значокт

2011-це кизоня Российскяй Федерациянь Правительствась ладясь Ю. А. Гагаринонь лемса космосса оцю сатфксонкса премия.

Ю. А. Гагаринонди лемс сёрматфт морот, ладяф музыка, тиф-нолдаф эрь кодама фильма и кино.

Ю. А. Гагаринонь сёрматфонза

Ю. А. Гагарин космосу лиеманц колга лятфнесь эсь сёрматфсонза. Синь лисендсть эрь кодама журналса и газетаса. Гагарин Ю. А. Дорога в космос. Записки лётчика-космонавта СССР. — М.: Правда, 1961. Гагарин Ю. А., Лебедев В. И. Психология и космос. — М.: Молодая гвардия (серия «Эврика»), 1968, 1976. — 207 с.

Лятфтамат

Мяльполаткст

«… аляц плотниколь, а тядяц — траксонь потяель. Цебярь покодеманц инкса сонь путозь колхозонь лофцонь-товарнай фермав оцюнякс.» — Гагарин, 1961 Звание присвоено Центральным советом Союза спортивных обществ и организаций СССР. Ю. А. Гагарин — заслуженный мастер спорта СССР // «Известия» : Газета. — 1961. — 14 апреля (№ 90 (13636)). — С. 3.

Библиографиясь

• Гагарин, Ю. А. Дорога в космос. Записки лётчика-космонавта СССР.. — М.: Правда, 1961.
• Гагарин, Ю. А., Лебедев, В.И. Психология и космос. — М.: Молодая гвардия серия="Эврика", 1968. — 207 с.

Ванк нинге

• Космонавтикань шись
• Ломанть космосу лиемань международнай шись
• Эрь кодама масторонь космонавттнень васенце лиемасна

Литературась

Рузонь кяльса

• Артёмов В. В. Юрий Гагарин. Человек-легенда. — М.: Олма Медиа Групп, 2011. — 272 с. — 6000 экз. — ISBN 978-5-373-03953-6.
• Берег Вселенной / под ред. Болтенко А. С.. — Киев: «Феникс», 2014. — ISBN 978-966-136-169-9.
• Гагарин, Валентин Алексеевич. Мой брат Юрий: Повесть: Об Ю. А. Гагарине / Лит. запись В. Сафонова. — 2-е изд., доп. — М.: Московский рабочий, 1979. — 384 с.
• Гагарин Ю. А. Дорога в космос. — М.: Воениздат, 1978. — 370 с. — 100 000 экз.
• Гагарина А. Т. Слово о сыне / Запись Т. Копыловой. — М.: Молодая гвардия, 1983. — 160 с.
• Гагарина А. Т., Копылова Т. А. Юрий Гагарин. Глазами матери. — Культурная Революция, 2011. — 368 с. — 2000 экз. — ISBN 978-5-250-06090-5.
• Галлай М. Л. С человеком на борту. — М.: Советский писатель, 1985.
• Губарев Владимир. Тайны Гагарина. — Эксмо, 2011. — 320 с. — (Первые в космосе). — 4000 экз. — ISBN 978-5-699-48162-0.
• Губарев Владимир. Величайшая тайна Гагарина. Мифы и правда о Первом космонавте СССР. — М.: Эксмо, Яуза, 2014. — 320 с. — (Юбилейные биографии). — 1500 экз. — ISBN 978-5-699-70593-1.
• Давыдов В. А. Первый Пилотируемый Полёт. — М.: Родина Медия, 2011. — 1096 с. — (Юбилейные биографии). — ISBN 978-5-905350-01-6.
• Данилкин Л. А. Юрий Гагарин. — М.: Молодая гвардия, 2011. — (Жизнь замечательных людей). — 20 000 экз. — ISBN 978-5-235-03440-2.
• Докучаев Ю. Юрий Гагарин. — М.: Детская литература, 1981. — 144 с.
• Ковешников Юрий. Уроки Юрия Гагарина. — Л.: Лениздат, 1984. — 190 с. — (Библиотека молодого рабочего).
• Надеждин Николай. Юрий Гагарин. — М.: Астрель, 2011. — 224 с. — (Секрет успеха). — 3000 экз. — ISBN 978-5-98986-523-9.
• Надеждин Николай. Юрий Гагарин. — М.: Мир энциклопедий Аванта +, 2011. — 224 с. — (Секрет успеха). — 3000 экз. — ISBN 978-5-271-37687-0.
• Порохня Виктор. Дорога на Байконур. Рассказ о Юрии Гагарине. — Казахстан, 1977. — 104 с.
• Ребров М. Ф. Советские космонавты. — 2-е изд., доп. и перераб. — М.: Воениздат, 1983. — 308 с.
• Степанов Виктор. Юрий Гагарин. — «Молодая гвардия», 1987. — 336 с. — (Жизнь замечательных людей).
• Хайрюзов Валерий. Юрий Гагарин. Колумб Вселенной. — Вече, 2011. — 368 с. — 3000 экз. — ISBN 978-5-9533-4994-9.

Лия кяльса

• Michael D. Cole. Vostok 1: First Human in Space. — Springfield: Enslow, 1995. — 48 с. — ISBN 0-89490-541-4.
• Robert Kluge. Der Sowjetische Traum Vom Fliegen: Analyseversuch Eines Gesellschaftlichen Phanomens. — München: Verlag Otto Sagner, 1997. — 345 с. — (Slavistische Beiträge). — ISBN 3-87690-665-2.
• Gerhard Kowalski. Die Gagarin-Story. Die Wahrheit über den Flug des ersten Kosmonauten der Welt. — Berlin: Schwarzkopf & Schwarzkopf, 1999. — ISBN 3-89602-184-2.
• Jamie Doran, Piers Bizony. Starman: The Truth Behind The Legend Of Yuri Gagarin. — London: Bloomsbury, 2011. — 256 с. — ISBN 0-7475-3688-0.
• Walter Famler. Im Zeichen des Roten Sterns: Zur ikonografischen Kodierung des Kosmospiloten Juri Gagarin. — Berlin: Kulturmaschinen, 2011. — 51 с. — (Kulturmaschinen Prosaedition). — ISBN 978-3-940274-35-9.
• Susanne Göhlich. Juri fliegt zu den Sternen. — Frankfurt: Moritz Verlag-GmbH, 2011. — 40 с. — ISBN 978-3-89565-230-1.
• Gerhard Kowalski. Heute 6:07 UT: vor 50 Jahren: Juri Gagarin als erster Mensch im Weltraum. — Halle: Projekte-Verlag Cornelius, 2011. — 319 с. — ISBN 978-3-86237-507-3.
• Ludmila Pavlova-Marinsky. Juri Gagarin Das Leben. — Berlin: Neues Leben, 2011. — ISBN 978-3-355-01784-8.

Ссылкат

• 12 апреля 1961 года состоялся первый полёт человека в космос — Российское историческое общество
• Доклад Гагарина Н. С. Хрущёву об успешном завершении первого в мире космического полёта человека на YouTube