Божий Матерть Казанскяй шкаень ликоняц шиц

Божий Матерть Казанскяй шкаень ликоняц шиц руз. День иконы Казанской Божией Матери— православнай ила, кона кизоти кафксть – 21 июльста и 4 ноябрьста.

Илать эрямопингоц

Кизоти кафксть – 21 июльста и 4 ноябрьста православнай ломаттне тяштькстасазь Божий Матерть Казанскяй шкаень ликонянц шинц. Мокшетне и эрзятне тожа сюконякшнихть Божий Матерть Казанскяй шкаень ликонянцты.

1579 кизоня Казанць юрнась толса, кона плхтазе марнек ошть. Ся пингть Божий Матерсь эвондась вейхкса кизоса Матрона стирнять онц. Сонць няфтезе, кода кулуфнень потмоста эряви мумс ликонянц. Стирь-шабась тяфта и тись. Мольсь азф вастти и кармась шувома. Теенза ушедсть лездома лия ломаттневок Муфоль ташта щамонь ожас ашкотф Божий Матерть шкаень ликоняц. Сон валдоль, толсь ашезе тока. Эстокиге ломаттне кармасть сашендома ликонять ванома. Сембе озондсть и сюконякшнесть теенза. Тянь колга кульсь и ошень архиепископсь. Сон пуроптсь крестнай ход и кандозе муф ликонять маластонь храму. Молебенда меле шкаень ликонясь ётафтфоль Благовещенскяй собору. Ки лангса ульсь васенце чудась – кармась няема Иосиф старецсь, кона тяда инголе колма кизот сокороль. Мзярда шкаень ликонять кандозь собору – эздонза кармась няема нинге фкя сокор ломань - Никита. Меле содафоль, што тя ликонясь копияль Божий Матерть чудотворнай образонц эзда, конань сермадозе сонць евангелистсь Лука.

Ликонять няфтеманза

Меле Божий Матерть Казанскяй шкаень ликонянц эзда копия ульсь ся войскатнень эса, конат панезь Россияста польскяй врьгятихне. Тя событияти лемтьфоль Москуса Якстерь площадьса руз. Красная площадь стяфтф Казанскяй соборсь. Виде, XX векть ушетксста срафтфоль-калафтфоль, а тяни тиф одукс . Божий Матерть Казанскяй шкаень ликонянцты озондома сятненди, кинь сярядихть сельмонза. Шиц, кода ни азоськ, тяштькстави кафксть кизоти – 21 июльста и 4 ноябрьста.

Ссылкатне

http://tbam.ru/Sobitiya/427122/ Праздник Казанской иконы Божией матери

https://azbyka.ru/prazdniki-cerkovnye