Пшкядемась мокшень кялень корхтамань этикетса

Пшкядемась руз. (Обращение в речевом этикете) — валсь и раднянь-плямань лепне, сяда шуроста или валонь пуромкссь (группась), кона лемдьсы сянь кинди шарфтф корхтамась. Сембода сидеста пшкядемакс молихть эсь лепне, сяда шуроста – ракшань и аф эрек предметонь лепне.

Пшкядемать шарьхкодемац

Пшкядемати синонимкс ащи «вокатив» валсь, кона латинскяй кяльста лат. (vocativus) ётафневи, кода звательнай падеж. Сонь кафта смузенза: 1) вокативсь — звательнай падеж; 2) вокативсь — пшкядема. Вокативсь валрисьмоса ащи башка и сонь вельденза няфтеви кинди -кинди или мезти-мезти пшкядемась. Пшкядемати ули кода ащемс валрисьмоть эзда башка или сувамс эзонза, ащемок ушетксса, кучкаса и песа. Валрисьмоть видеса, пшкядемась аф лувондови валрисьмонь членкс, сон аф сотови валрисьмонь лия валхнень мархта и ванфтсы грамматикань эсь лацонь ширенц: Монь, цёрат, пекозе вачсь (Ю. Кузнецов).

Корхтамста пшкядемась азондови эсь лацонь тердемань интонация вельде, кона сотф валрисьмоса пшкядемать вастонц, экспрессивностенц и келиста нолдаманц мархта. Сяда пяк тердемань интонацияса явфневихть башка валрисьмокс ащи пшкядематне: Велень ават! Мазы стирьхть! Сединь токазь морайхть, шаронттада тячи кштирькс… (И. Кудашкин). Ломатть! Мяляфтость и содасть: марстонь кудоньке минь – Модась, марстонь валдоньке минь – Шись (Н. Циликин). Тяфтама валрисьмотне тёждяста ётайхть эсь лацонь башка валрисьмокс – вокативнайкс. Бабай! – эняльгодсь Шумбасовась. – Саты (А. Тяпаев). Тяфтама валрисьмоса пшкядемась стакалготф смузень оттенкаса: эсонза маряви эняльдема, абондома, такалдома. Валрисьмотне-пшкядематне пяк козят интонациянь оттенкаса. Вокативнай валрисьмотнень васенцекс тяшкстазень А.А. Шахматов

«Тяза сувафневихть валрисьмотне, конатнень эса главнай и фкя или сяка членкс ащи пшкядемась, лицать лемоц, конанди шарфтови корхтамась, кда сон азови башка интонацияса, конац няфти эрь кодама ёжемарямат:сюдома, апрякама, сюцема».

Воктивнай валрисьмотне – нят тяфтама валрисьмот, конат ащихть фкя или сяда лама валста-пшкядемаста и няфтихть эрь кодама ёжемарямат и мяльхть: ужяльдема, абондома, эводема, кенярдема, лажнама, таколдома. Валрисьмоть потмоса кой-кона пшкядематне станя жа няфтихть стака ёжемарямат. Вокативнай валрисьмотне шарьхкодевихть сянь коряс, што синь сембода сидеста молихть, кода башка валрисьмот, сяда сидеста кошардомань, а пшкядемась ащи валрисьмоть потмоса.

Валрисьмоть ушетксса моли пшкядемать эса интонациясь тердемань: Иван Иваныч, тинь куд шири аф курок? (М. Бебан) Валрисмьмоть кучкаса пшкядемась няфневи аф пяк оцю лоткама вельде, азови вишкста и алгак вайгяльса, аньцек эсонза уленди и тердемань интонация: Аряда, ялгат, археологиянь кабинету, тоза лама ломань кочкавсь ни (Ю. Кузнецов). Валрисьмоть песа пшкядемать эса интонациясь сяда лафча: Шава сань, ялгат. Магазиттнень эса аш мезевок (Л. Макулов). Кда валрисьмоса мзяровок пшкядема молихть пецек-пецек, эста синь азовихть лувомань интонацияса, конань эса ули тердемань оттенкавок: Алянят! Аванят! Тясть шава куломс! (И. Кишняков).

Пшкядемась мялень сявомань функцияда башка, канни питнень максома функция, коса пшкядемань лицати (предметти) максови аф фкя лацонь характеристика. Тяфтама пшкядематне сидеста няфневихть экспрессивнай валса и синь пяк козят азомань интонациясна:А тяни азка акша капста пряняй, кода лемце? (В. Мишанина).

Пшкядемать няфтемац

Мокшень кяльса ули эсь лацонь пшкядемань (звательнай) форма, кона няфтеви -й, -кай суффиксса (-кай суффикссь касфтф -ка пяльксса). Сембода сидеста ня суффикссне полаткшневихть раднянь-плямань термиттненди: – Тядяй, а кода сонь лемоц? (Т. Кирдяшкин). Ладяй, атяй, пяк ладяй! (И. Девин).

Мокшень кяльса -й пшкядемань суффикссь пяк сидеста полаткшневи -ня, -кя ляпопты-кирьфтай суффикста меле, мезсь максы ляпоняста пшкядемань лангс няфтема: Тядяняй, тямак кадонда… сявомак мархтот (В. Мишанина). Вай, палдоскяй, терделемайть пачада ярхцама (Е. Терешкина).

Пшкядемась нинге няфневи лично-притяжательнай суффиксса: Тядянязе-фкянязе, лямбоняста щайнязе… (С. Кинякин) Сидеста пшкядемась няфневи номинативнай формаса ащи существительнайса – тя эсь лепне, раднянь-плямань лепне, профессиянь эряфонь кизонь аля или ава вайме ломань лангс няфти валхт: Лена, а косоль Ритась тячи шобдава? Ну, кода, доктор ялгась, озась седице? (Л. Макулов) –Уй, акляй, визьксоньковок аф виздеви (М. Бебан).

Валхне-пшкядематне: «брат»,«браткяй», «браток» кандыхть ялгаксшинь оттенка и пцтай юмафтсазь эсь лексическяй смузьснон: – Учёнайкс мяльце арамс, брат, наукань кандидатокс (Ю. Кузнецов). Корхтамань кяльса пшкядемась сидеста азондови «а» частицать мархта: Сержант, а сержант, стяк – токсемань лафтути (Ю. Кузнецов). 2-це лицань местоименияса няфтеви пшкядемась канды казямшинь смузь и тевс ноляви корхтамань кяльса кодамовок междометия мархта: Эй, тинь! Месть тоса нюрьктяда? (Т. Кирдяшкин). Пшкядемакс эряй и субстантивировандаф корхтама пялькссь:Колмоцесь, листь тяза! («Мокша»).

Фольклорса сидеста васьфневи эсь лацонь пшкядемань тип. Тя кафксть азови пшкядемат: аляй-тряйняй, шкайняй-матаняй, тядяняй-авайняй и лият.

Художественнай сяда сидеста поэтическяй и ораторскяй текстттнень эса васьфневихть келиста таргави пшкядематне. Кода фалу нят существительнайхть, конатнень видеса молихть определеният и приложеният: Сизеф седи, сетьмок ацентть! (Н. Циликин).

Россия! Сенем сельме сазор, мзярда стяят пильголангс? (Р. Орлова).

Распространеннай пшкядематне эряйхть пяк келихть, синь арсихть целай валрисьмонь или мянь сембе стихонь содержаниякс: Мокша аваняй,

Мазы шаманяй,

Тевса маштыняй,

Идень раштайняй,

Келькте, сетьмоняй,

Сенем сельмоняй,

Горняй пайгоняй,

Морса кайгиняй… (Р. Орлова). Пшкядематненди ули кода молемс мельцек, тиемок однороднай ряд: Кельги ава, коронь кирди, тямак сюда, хоть и сон тейть мирде.

Мокшень кяльса пшкядемась васьфневи пяк сидеста. Сяда сидеста сон васьфневи корхтамань кяльса, сяда пяк карань-каршек корхтамста. Тяфтама пшкядематнень юрса ащи функциясна – лемдемс каршек корхтайть. Поэтическяй и ораторскяй корхтамаса пшкядемась канды эсь лацонь стилень ширде функция: экспрессивно-оценочнай смузь, сяда сидеста синь метафоричнайхть: Пакся… Сёронь канды пакся, мезень сатонзе зиян? (Н. Циликин).

Пшкядемать видеса лотксема тяштенятне

Валрисьмоть потомса пшкядемась явфневи лотксема тяштеняса. Мзярда пшкядемась ащи валрисьмоть ушетксса, эста сон явфневи запятойса. Валрисьмоть кучкаса явфневи запятойса кафцьке ширде. Мзярда пшкядемась ащи валрисьмоть песа, сонь инголенза путневи запятой, а мельганза смузень коряс – точка, виияфтома тяштеня или кизефтемань тяштеня.

- Архт, архт, щакай (В. Мишанина)

Ворьте, ивяляй! Тят шорсе (М. Бебан)

– Мезе мархтот, Люся?

Литературась

1. Мокшень кяль. Синтаксис / Алямкин Н. С., Поляков О.С.. — Саранск: Изд-во Мордов. ун-та, 2008. — 200 с. — ISBN 978-5-7103-1755-6.

2. Шахматов, Алексей Александрович (1864-1920.). Синтаксис русского языка [Текст] / Ред. и комментарии проф. Е. С. Истриной. - 2-е изд. - Ленинград : Учпедгиз, Ленингр. отд-ние, 1941. - 620 с.

Гришунина В.П. Мокшень якяльса вокативсь. — 2004. — № 4. — С. 121-124.

Ссылкатне

https://cyberleninka.ru/article/n/slovo-o-sintaksise-russkogo-yazyka-akademika-a-a-shahmatova Слово о «Синтаксисе русского языка» академика А. А. Шахматова