Мокшень поза
Поза руз.: мокшанский национальный напиток — мокшень кунардонь симомбяльсь. Поза шорсесть-нолясть озксонди, оцю иланди.
Поза мокшень койса
Россиясь лама нациянь мастор. Тяса эряйхть руст, мокшет, эрзят, татархт, чувашт, мариецт и лият. Эрь нациять улихть сонцень коенза, обуцянза, кштиманза, моронза, ярхцамбяленза, симомбяленза и щамонза.
Мокшетнень ульсь тяфтама койсна — Авань поза. Тя илась ётафневсь Очижида меле кафта недялянь ётазь. Велень куроста аватне пуромкшнесть фкя оцю кудс, каннесть мархтост розень почфт, марса шорсесть пяденцяста авань поза. Позанди аноклакшневсь эрь кодама цебярь тише, коське якстеряпст. Шорямда меле фкя-фкянь каванямста, аватне арьсекшнесть велеряйснонды пара шумбраши, сетьме пиземнят, козя сёронь шачема. Мекпяли ся кудста, коса шорсесть-нолясть авань поза, кукшеннять каннезь ся куду, коса тяфтама ила ётафтови сай кизоть[1].
Позань шорямась-нолдамась
Танцти, цебярь, шову, мокшень позать шорямац-нолдамац аф тёждяль[2].
Пяденцяста позать шорселезь, тиендсть розень почфста, сахарста, якстеряпсста, керсеф тишеста цюкорнят, конатнень путнезь пидемс уштф-явафтф пянакуду, конань седяфонц ваденделезь сёвоньца, штоба ванфтомс псинц.
Ёткшиста цюкорхнень таркселезь, марселезь оцю парьняс-спускс. Меле кайсесть лангозонза лакай ведь сянкса, штоба сембе танцтись лисель ведьти. Обедта меле парьняста позать шудефнелезь оцю кядьгос. Иляденди пицесть розь почф мархта сахар почфста сусла, конань аф ламода кельмофнезь, а меле мархтонза шапафнезь позать. Позать шапафтомда меле ётафнесть озкс, коса озонкшнесть шумбрашинкса, козя урожаенкса, сетьме эряфонкса, фкя-фкянь мархта ладяманкса.
Недляшиста, азоравась, конань кудса ётафневсь авань позась, якась курова, пачфнесь латта, штоба веляряйхне сальхть позада симома. Азоравать пцтай эрь кудса озафнелезь эзем лангс, коза ацсесть ор. Тя тиендевсь сянкса, штоба лия азораватнень нарвайсна лихтельхть сяда лама сараз лефкс. Недляшиста ломаттне пуромкшнесть позада симома, кштикшнесть, морсесть мокшень мора|мокшень морот, сиде моронят. Иляденди кудазорсь, коса ётафтовсь авань позась, каннелезе кукшенть ся куду, коса тяфтама ила ётафтоволь сай кизоть.
Позать шорямац-анокламац
Мокшень эрь кодама велеса позать шорсезь-нолязь аф фкя лаца. Ульсь и тяфта. Васень пингть сонь пицезь розень почфста, а меле ламбама якстеряпсста. Розень почфста позать тиемста аноклакшнесть солод, сон тиендевсь касфтф-лисьф сёраста. Тя розть яжафнезь кядьгевса или томбсезь шоварняса. Солодть шоворякшнезь розь почф мархта, кайсесть ёткозонза ведь, меле путнезь цюгунца пянакудс 2-3 шинди. Паряф солодть меле кайсезь оцю, кели парьс. Кайсесть парьти юфт, шорсезь паряф солодть мархта и тага путнезь пянакуду. Омбоцеда парямда меле, меки кайсезь парьняв и пяшкотькшнезь парьнять лакай ведьса. Нолдаф суслать кельмофнезь, а меле каселезь парьняв [3].
Лятфтамат
Литературась
- Мордовская кухня // Мордовия : Энциклопедия : в 2 т. / гл. ред. А. И. Сухарев. — Саранск: Институт гуманитарных наук при Правительстве Республики Мордовия, 2004. — Т. 2 (М-Я). — 704 с. — ISBN 5-900029-08-5.
- Мордовская кухня // Культура питания. Энциклопедический справочник / Под ред. И. А. Чаховского. — 3-е издание. — Мн.: «Белорусская энциклопедия имени Петруся Бровки», 1993. — С. 186. — 540 с. — ISBN 5-85700-122-6.