Кузьмась (илась)

Кузьмась руз. День Кузьмы и Демьяна — мокшень сире пингонь илась.

Кузьмась — сире пингонь илась. Сире пинкнень эрь велеть ульсь сонцень престольнай праздникоц. Фкя велеса Миколась, омбоцеса — Михалусь.

Ковылкинскяй райононь Альтя руз. Алькино велеса тяфтама праздниколь Кузьмась. Сонь илац ванондови 14-це ноябрьста.

Кузьма праздниксь кафта иняру ломанень — Кузьмань и Демьянонь. Синь ульсть цебярь работникт, сембода лац содазь кузнецонь тефнень. Тиендсть тя алятне сокат и инзамат, узерьхть и пилат, а работаснон инкса ярмак ашесть сявонде, сяс и святойкс-инярукс лемдезь.

Колгаст ладяфт и валмуворкст. Кепотьксонди: «Кузьма и Демьян модать и ведть лангса эйть ковандазь» руз. "Кузьма и Демьян на земле и на воде лед сковали", «Кузьмань и Демьянонь ковандафсна солай аньцек, мзярда сай лямбе тундась» руз. Скованное Кузьмой и Демьяном растает, только когда придет теплая весна.

Ня сятойхнень лемса Марий Эл Республикаса нльне ули Козьмодемьянск ош.

Кузьмань шить ётафтомац

Сире пингть Кузьмань шись ётафневоль тяфта. Альтя руз. Алькино велеса тя илать васьфнелезь оцю мяльса. Тернельхть инжихть аф аньцек эсь велеста, но и шабрань велетнень эздовок. Сидеста сашендсть Альтя вели тя илать ётафтома Сире и Од Дракаста руз. Старое Дракино, Пяцёраста руз. Пичуры, Майданцта руз. Янгужинский Майдан. Пуромкшнесть-якасть раднятне фкя-фкянь пяли Кузьмать ётафтома.

Од стирьхне аноклакшнельхть ила: каннесть фкя оцю кудс симомбяль и ярхцамбяль, а илять пуромкшнесть тоза. Сашендсть и цёратне гармония мархта. И ушеткшнесь весяла илась: кштисть, морасть, азонкшнесть ёфкст, валмуворкст.

Меле лисендсть ульцяв, и цёратне варчсесть фкя-фкянь мокшендаса. Кие кинь сяськи. Ашезь мярьгондев эрьхнемс пильгса и эрьхнемс прафть. Ашезь кельге кие ворьготькшнесь или кяшендсь. Од стирьхне ванцть «тюрихнень» лангс, приметнезь инь виихнень, путнезь мялезост, кинь мархта арамс ялгакс. Мокшендаса (клокса) «тюремда» меле сембе озсесть шратнень ваксс, и кивок киньге лангс ашезь кирде кяж, хоть и варжасть фкя-фкянь мокшендат.

Кузьманди ярхцамбялень анокламась

Альтя велеса Кузьманди печксесть тувот. Тувонь сивольть эзда пушнесть щяняпт, пицесть студень, тиендсть-пицесть шапакс потмос тонгф сиволень оцю пакш пянакудса. Тяфта жа пицесть суронь пачат и плинцят, нолнесть шову поза. Кузьманди нинге тиендсть модамарень щяняпт, лофцса пицесть модамарень лапшат.