А.С. Пушкинонь лемса библиотекати-125

Мордовия Республикань А. С. Пушкинонь лемса национальнай библиотекась
Ащема вастсь	Россия, Саранск ошсь, Б.Хмельницкого, 26 курось
Ушетф	14-це сентябрьста] 1899-це кизоня
Фондсь
Фондть мароц	1 млн. малава ванфтомань единица
Сувамась и тевс нолдамась
Макссеви эрь кизоня	900-да тёжяньда лама
Мельге якамась	40 000
Лия информация
Директорсь	Бакулина Анастасия Владимировна
Покодихне	142
Веб-сайтсь	natlibraryrm.ru

А. С. Пушкинонь лемса республиканскяй национальнай библиотекась— инь оцю государственнай библиотекась Мордовия Республикаса. Тядде 14-це сентябрьста теенза топоди 125 киза.

Эрямопингоц

Библиотекась ётась кувака и аф тёждя ки. 1899-це кизонь 14-це сентябрьста ошень интеллигенциять эняльдеманц коряс Саранскяйса панчфоль народнай библиотека-морафтомань куд, коса книгатне морафтомс макссевсть сашендыхненди ярмакфтома. Ся кизотнень библиотекать фондса ульсь аньцек 353 книга. Книгань лувксть касфтоманкса, ошса ётафневсть благотворительнай спектакльхть, лотереят, конатнень эзда сявф ярмакне мольсть библиотекав книгань рамаманди. Саранскяень уездонь козя ломаттне максезь библиотекав эсь книгаснон и журналснон. Тя ёмла библиотекать эзда и ушедовсь А. С. Пушкинонь лемса Мордовиянь национальнай библиотекать эрямань киц.

1919 — 1920-це кизотнень народнай библиотекась-морафтомань кудсь шоворсь марс Публичнай библиотекать мархта и арась Саранскяень центральнай уезднай библиотекакс. Мзярда кафта библиотекань фонттне арасть марстоннекс, панчфоль колма отделхт: научнай, художественнай и идень литературань. Библиотекась ламоксть полафнезе лемонц, а 1935-це кизоня сон лемтьфоль Республиканскяйкс. 1939-це кизоня библиотекать лемс строяфоль башка куд, тяни тоса Идень республиканскяй библиотекась, и тяка кизоста сявомок, сон каннесы содаф рузонь поэтть Александр Сергеевич Пушкинонь лемонц.

1958-це кизоста сявомок библиотекась арась и Книгань палатакс, сон ащи ванфтома вастокс национальнай и краеведческяй фонттненди.

1970-це кизоня библиотекась ётафтовсь од кудс, кона стяфтфоль Богдан Хмельницкяень лемса куроса, тя вастса библиотекась ащи тячити самс.

1991-це кизонь 11-це мартста Мордовиянь Министрань Советть постановлениянц коряс Республикань библиотекась ушедсь каннема од статус, сон арась Национальнайкс. Лядяфтольхть соткст омба масторонь (Венгриянь, Финляндиянь, Эстониянь) и минцень финно-угрань руспубликань библиотекатнень мархта, штоба кочкамс-пуроптомс документонь и книгань сяда козя и оцю фонд мокшэрзятнень и лия финно-угрань нароттнень колга.

2009-це кизоня библиотекати стяфтфоль вейхкса этажса од корпус, тяфта библиотекась ламода кассь.

Библиотекать тячиец

Тяни А. С. Пушкинонь лемса Мордовиянь национальнай библиотекась — республиканьконь инь васенце государственнай библиотекац. Сонь фондозонза сувси миллионда лама ванфтомань единица. Республикань печатнай изданиянь фондса ванфневи 141 тежяньда лама документонь экземпляр. Библиотекаса 22 отдел, кона вяти методическяй, информационнай, научно-исследовательскяй тефт. Тяда башка, оцю работа тиендеви эрь кодама проектонь и грантонь коряс. Мокшень, эрзянь и лия финно-угрань кяльса литературась ванфневи Национальнай и краеведческяй литературань отделса. Тяниень пингонь библиотекань технологиятне сатомшка вишкста молихть инголи виртуальнай ётка вастса. Тячи бибилиотекать лезксонц ули кода сявомс ичкозде вастса улезь официальнай сайтонц вельде. Библиотекать сайтса ули «Виртуальная справочная служба» пялькс, конань видеса сайту эрь сувайти кизефксонц коряс библиотекарть эзда максови каршек вал колма шиста. Тяда башка ули кода касфтомс кирдема пингть заказаф изданиятнень лангс, ули онлайн-приемнай, электроннайста документонь пачфтема.

Национальная библиотекась ащи научнай и методическяй центракс 495 муниципальнай библиотеканди региональнай библиотечнай сообществатненди инголи вятикс. Библиотекань сайтти эрь кизоня сувси 130 тёжянть малава ломань. 2019-це кизоня ушедсть путнема штрихкотт документтненди и сувафтсть марстонь электронный читательскяй билет. Национальнай библиотекаса ётафневихть книгань эрь кодама презентацият, юбилейнай илятть. Тяда башка библиотекаса ётафневихть: вебинархт, флешмопт, квестт и буккроссинкт и лама мезе лия. Библиотекать ламоц культурно-просветительскяй мероприятиянза лувондовихть марстонь теварьсефксокс культурань и образованиянь учреждениятнень ёткса. Библиотекась кирди партнерскяй соткст 200-да лама предприятиянь, государственнай и общественнай организациянь, аф некоммерческяй фонттнень мархта. а тяфта жа Мокшэрзянь межрегиональнай бщественнай организациять исполкомонц мархта Исполкомом руз. (Межрегиональная общественная организация мордовского (мокшанского, эрзянского) народа), Мордовия Республикань Центральнай избирательнай комиссиять, Финно-угорскяй народонь культурань Поволжскяй центрать руз. (Поволжский центр культур финно-угорских народов), высшай образованиянь духовнай образовательнай организациять Рузонь Православнай Церькавонь «Саранскяй духовнай семинариянь Саранскяень и Мордовскяй Епархиять», Мордовия Республикань Туристско-информационнай центрать, «Росичи» моронь тетрать, «Новомед» тяниень пингонь медицинскяй центрать, «Я рисую» Изостудиять мархта. 2024-це кизонь июльста партнерскаяй сокст ладяфт «РУВИКИ» АНО-ть мархта.

Ссылкатне

• https://natlibraryrm.ru/Главная - Национальная библиотека им. А. С. Пушкина Республики Мордовия
• https://www.finnougoria.ru/community/institution/section.php?day=2&month=9&year=2024&SECTION_ID=463&ELEMENT_ID=2953Некоммерческая ассоциация «Поволжский центр культур финно-угорских народов» в Республике Мордовия
• https://mordvarf.com/Межрегиональная общественная организация мордовского (мокшанского и эрзянского) народа.